विमानतळ रस्त्यावर मोटारीची दोन वाहनांना धडक

पुणे, ता. ९ : भरधाव मोटारीने दोन वाहनांना जोरदार धडक दिल्याची घटना सोमवारी (ता. ८) विमानतळ रस्त्यावर घडली. यात तीनही मोटारींचे नुकसान झाले. दरम्यान, मोटारचालकाने मद्य सेवन केल्याचे पोलिस तपासात समोर आले आहे.
पोलिसांनी दिलेल्या माहितीनुसार, सोमवारी सकाळी अकरा वाजण्याच्या सुमारास विमानतळ रस्त्यावरील पुरू सोसायटीजवळ मोटारचालक जितेंद्रसिंग चहल याने समोरून येणाऱ्या मोटारीसह एका टेम्पो रिक्षाला जोरदार धडक दिली. या अपघातात तीनही वाहनांचे नुकसान झाले आहे. या घटनेत कोणीही जखमी झालेले नाही. मात्र, मोटारचालकाने मद्यसेवन केल्याचा अहवाल प्राप्त झाल्याचे पोलिसांकडून सांगण्यात आले. अपघातानंतर विमानतळ पोलिस ठाण्यात गुन्हा दाखल करण्यात येत आहे. पुढील कायदेशीर कारवाईसाठी तीनही वाहने पोलिसांनी ताब्यात घेतल्याची माहिती वाहतूक शाखेचे पोलिस उपायुक्त हिंमत जाधव यांनी दिली.