‘जीबीएस’चा उद्रेक होऊनही, प्रशासन धडा घेईना सिंहगड रस्‍ता भागातील तीन आरोग्य केंद्र व १८ उपकेंद्राचे हस्तांतर रखडले

पुणे, ता. १९ : वर्षाच्‍या सुरवातीला सिंहगड रस्‍ता परिसरातील गावांमध्‍ये गुलियन बॅरी सिंड्रोमचा (जीबीएस) उद्रेक होऊन, त्‍यामध्‍ये ११ नागरिकांचा बळी गेला. त्‍यावेळी जिल्‍हा प्रशासनाकडून पुणे महापालिकेत समाविष्‍ट झालेल्‍या या गावांमधील ३ प्राथमिक आरोग्य केंद्र, १८ उपकेंद्रांचे महापालिकेच्‍या आरोग्‍य विभागाकडील हस्तांतर रखडल्‍याचे समोर आले होते. सहा महिन्यांनंतरही परिस्थिती ‘जैसे थे’ आहे.
‘जीबीएस’चा उद्रेक हा सिंहगड रस्‍ता, धायरी, नांदेड सिटी, नांदेड गाव, किरकटवाडी व खडकवासला या परिसरात झाला होता. दूषित पाणीस्‍त्रोतांमुळे हा उद्रेक झाल्‍याचा निष्‍कर्ष आरोग्‍य यंत्रणांनी काढला. नांदेड गावातील विहिरीचे पाणी हे किरकटवाडी, नांदेड गाव, नांदोशी या गावांना पुरवले जाते. तसेच, धायरीतील डीएसके सोसायटीमधील रहिवाशांनाही प्रक्रिया न केलेले पाणी पुरवले गेल्‍याने तेथे रुग्‍णसंख्‍या मोठी आढळलेली होती. परंतु, रुग्‍ण वाढत असतानाच येथील आरोग्‍य यंत्रणेला याबाबात काही माहिती नव्‍हती. या रुग्णांची संख्‍या खासगी रुग्‍णालयात वाढल्‍यावरच महापालिकेला याबाबत माहिती पडली. या रुग्‍णांना जीबीएसची लक्षणे दिसण्‍याआधी त्‍याआधी किरकटवाडी भागातील नागरिकांना पंधरा दिवसांपासून उलटी, जुलाब ही लक्षणे घरोघर दिसून येत होती. त्‍याची नोंद येथील खासगी दवाखान्‍यांमध्‍ये झाली आहे. मात्र, महापालिकेचे उपकेंद्र व प्राथमिक आरोग्‍य केंद्रांना लागली नाही, हे येथील आरोग्‍य यंत्रणांचे अपयशही दिसून आले.

गावांची आरोग्‍यसेवा वाऱ्यावर
नांदेड गाव, किरकटवाडी व २१ गावांचा समावेश महापालिकेच्‍या हद्दीत जून २०२१ मध्‍ये झालेला आहे. या नव्‍याने समाविष्‍ट केलेल्‍या सिंहगड रस्‍ता परिसरातील गावांमध्‍ये ३ प्राथमिक आरोग्‍य केंद्र तर १८ आरोग्‍य उपकेंद्र आहेत. सध्‍या तेथे जिल्‍हा परिषदेची आरोग्‍य यंत्रणा व मनुष्यबळ कार्यरत आहे. परंतु, गावांचे हस्तांतर झाल्‍याने या परिसरातील पाणी शुद्धीकरण यंत्रणेकडे लक्ष नसणे, पाणी साठा करण्‍यात येणाऱ्या टाक्‍यांची स्‍वच्‍छता पूर्वीसारखी होत नसल्‍याची माहिती येथील स्‍थानिक नागरिक देतात.
...................
जिल्‍हा प्रशासनाकडून अद्याप तीन प्राथमिक आरोग्‍य केंद्र, १८ उपकेंद्र व त्‍यांच्‍या मनुष्‍यबळाचे हस्तांतर महापालिकेला झालेले नाही. याबाबतचा पाठपुरावा वरिष्‍ठ स्तरावरून करण्‍यात येत आहे.
– डॉ. नीना बोराडे, आरोग्‍य प्रमुख, पुणे महापालिका
.............
‘‘प्राथमिक आरोग्‍य केंद्र व उपकेंद्र यांचे हस्तांतर करण्‍याचा प्रस्‍ताव दोन वर्षांपूर्वीच आरोग्‍य आयुक्‍तालयाला पाठवला आहे. यामध्‍ये केवळ इमारती महापालिकेला देण्‍यात येतील तर मनुष्यबळ जिल्‍हा परिषदेकडेच राहणार आहे. महापालिकेकडून १३६ कोटी रुपये आम्‍हाला मिळावे, अशी मागणी केली आहे. याबाबत वारंवार स्‍मरणपत्रेही पाठवली आहेत. मात्र, तेथून अद्याप काही प्रतिसाद आलेला नाही. त्‍यामुळे हे हस्तांतर रखडले आहे.
– एक वरिष्‍ठ अधिकारी, जिल्‍हा परिषद, पुणे
......................

पुण्‍यातील जीबीएस ची आकडेवारी

एकूण रुग्‍णसंख्‍या – २२१
(शहर – ४४, महापालिकेत समावेश झालेल्‍या गावातील –९५
पिंपरी चिंचवड – ३३,
पुणे ग्रामीण – ३५,
इतर जिल्ह्यांमधील – १४
मृत्‍यू – ११
...............