राजकीय आणि प्रशासकीय घडामोडींना वेग गट, गण रचनेचा प्रारूप जाहीर झाल्यानंतर बैठका आणि आखाडपार्ट्यांना जोर

पुणे, ता. २० ः जिल्हा परिषद, पंचायत समितीच्या गट, गण रचनेच्या प्रारूप जाहीर झाल्यानंतर राजकीय घडामोडींना अधिक वेग आला आहे. राजकीय पक्षांनी पदाधिकाऱ्यांच्या तसेच इच्छुकांच्या बैठका घेण्यास सुरवात केली आहे तसेच गावोगावी आखाडपार्ट्या रंगू लागल्या आहेत.
ज्या गटाची रचना बदलली, त्या काही गावातील इच्छुक आणि नागरिक एकत्र येऊन गट, गण रचनेवर हरकती नोंदवत आहेत. सोमवारी हरकती सूचना दाखल करण्याचा अखेरचा दिवस आहे.
स्थानिक स्वराज्य संस्थांच्या निवडणुकांच्या अगोदर जिल्ह्यातील काही नेत्यांनी पक्ष बदलला, त्यांच्यासोबत कार्यकर्त्यांनीही झेंडा बदलला. सोमवारी (ता. १४) जिल्हा परिषद, पंचायत समितीच्या गट, गण रचनेचे प्रारूप प्रशासनाकडून जाहीर करण्यात आले. राज्यातील सत्तेत असलेल्या तिन्ही पक्षांच्या नेत्यांनी प्रारूप रचनेबद्दल समाधान व्यक्त केले तर विरोधातील पक्षांनी मात्र नाराजी व्यक्त केली. हे एका बाजूला सुरू असताना पक्षातील अंतर्गत बैठका, वरिष्ठ नेत्यांचे जिल्हा दौरा, सण, उत्सवात इच्छुकांचा सहभाग वाढला आहे.
विधानसभेत महायुतीच्या उमेदवारांकडून पराभव स्वीकाराव्या लागलेल्या माजी आमदार संग्राम थोपटे, संजय जगताप आणि जिल्हा परिषदेचे माजी बांधकाम व आरोग्य सभापती प्रवीण माने यांचा भाजपने प्रवेश घडवून आणला. तर दोन्ही राष्ट्रवादीकडून पदाधिकाऱ्यांच्या बैठकांवर जोर दिला आहे. काँग्रेसच्या जुन्या निष्ठावंतांची टीम पुन्हा एकदा जिल्ह्याच्या राजकारणात सक्रिय झाली आहे तर दोन्ही शिवसेना आपापल्या कार्यकर्त्यांना बळ देण्यासाठी त्यांची मोट बांधण्याचे काम तालुकास्तरावर करत आहेत. यावर्षी पहिल्यांदाच ‘आप’ पक्षाकडून जिल्हा परिषदेची निवडणूक लढवली जाणार असल्याची घोषणा नुकतीच पुण्यात करण्यात आली. त्यानुसार त्यांच्या दोन्ही जिल्हा प्रमुखांकडून इच्छुक उमेदवारांशी संवाद आणि पक्षाचे काम नागरिकांपर्यंत पोहोचविण्यासाठी बैठका सुरू केल्या आहेत.

तरुणांना संधीची अपेक्षा...
राष्ट्रवादी आणि शिवसेना पक्ष फुटल्याने यावर्षी आपल्याला उमेदवारीची संधी मिळेल, या अपेक्षेने जिल्ह्यातील तरुणांनी तयारी सुरू केली आहे. महाविकास आघाडी किंवा महायुतीमधील पक्ष जर वेगवेगळे निवडणुकीत उतरले तर अनेक नवीन चेहऱ्यांना जिल्हा परिषद, पंचायत समितीच्या निवडणुकीच्या माध्यमातून राजकारणात प्रवेश करण्याची संधी मिळणार आहे. त्यादृष्टीने अनेकांनी पक्षातील वरिष्ठांशी चर्चेवरही भर दिला असून, आरक्षण जाहीर झाल्यानंतर अधिक स्पष्टता येणार आहे.

गट, गणासाठी नागरिकच आग्रही...
जिल्ह्यातील अनेक गावांचे गट, गण बदलले आहेत. तळेगाव ढमढेरे गावाचे दोन गटात विभागणी झाल्याने गावातील नागरिक एकवटले आहेत. अशाचप्रकार हवेली तालुक्यातील काही गावातील नागरिकांनीही गट रचनेवर हरकती घेतल्या आहेत.