तरुणीच्या विनयभंगप्रकरणी ज्योतिषाला अटक

पुणे, ता. २० : भावाच्या जन्मपत्रिकेवर तोडगा काढण्याच्या बहाण्याने एका ज्योतिषाने तरुणीचा विनयभंग केल्याची धक्कादायक घटना धनकवडी परिसरात घडली. याप्रकरणी पोलिसांनी तत्काळ कारवाई करत ज्योतिषाला अटक केली आहे. न्यायालयाने या ज्योतिषाला रविवारी (ता. २०) न्यायालयीन कोठडी सुनावली आहे.
अखिलेश लक्ष्मण राजगुरू (वय ४५) असे अटक केलेल्या ज्योतिषाचे नाव आहे. पोलिसांनी दिलेल्या माहितीनुसार, एका २३ वर्षीय तरुणीच्या भावाला आयएएस, आयपीएस परीक्षेत अडचणी येत होत्या. त्यामुळे तरुणीने तिच्या भावाच्या जीवनातील अडचणी सोडवण्यासाठी अखिलेश राजगुरू या ज्योतिषाची धनकवडीतील कार्यालयात भेट घेतली होती. पत्रिका पाहिल्यानंतर राजगुरू याने अडचण दूर करण्यासाठी एका विशिष्ट वनस्पतीची गरज असल्याचे सांगितले. त्याने शनिवारी (ता. १९) तरुणीला संदेश पाठवून वनस्पती देण्याच्या निमित्ताने कार्यालयात बोलावले. ही तरुणी शनिवारी कार्यालयात आल्यानंतर त्याने तिच्या डोक्यावर वनस्पती ठेवून मंत्रोच्चार करीत मिठी मारून विनयभंग केला, असे तरुणीने फिर्यादीत म्हटले आहे.
या घटनेनंतर तरुणीने थेट सहकारनगर पोलिस ठाण्यात धाव घेतली. तिच्या तक्रारीवरून पोलिसांनी राजगुरू याच्याविरोधात महाराष्ट्र नरबळी आणि अघोरी प्रथा प्रतिबंधक कायदा, तसेच विनयभंग केल्याप्रकरणी गुन्हा दाखल केला आहे. पोलिसांनी ज्योतिषाला अटक केली आहे. पोलिसांनी या ज्योतिषाला रविवारी दुपारी न्यायालयात हजर केले. न्यायालयाने ज्योतिषाला न्यायालयीन कोठडीत ठेवण्याचा आदेश दिला आहे, अशी माहिती वरिष्ठ पोलिस निरीक्षक राहुल गौड यांनी दिली.