पुण्यात भेळ विक्रेत्यासह कामगारास टोळक्‍याकडून दांडक्‍याने जबर मारहाण

पुणे : भेळीचा गाडा लावण्यावरुन झालेल्या भांडणाच्या रागातून सात ते आठ जणांच्या टोळक्‍याने भेळविक्रेत्यासह त्याच्या कामगारास लाकडी दांडक्‍याने जबर मारहाण केली. याबरोबरच भेळीच्या गाड्याची तोडफोड करुन 25 हजार रुपयांचे नुकसान केले. ही घटना शनिवारी रात्री कात्रज परिसरात घडली. 

याप्रकरणी गौरव पोटघन (वय 22, रा.कात्रज) यांनी भारती विद्यापीठ पोलिस ठाण्यात फिर्याद दिली आहे. त्यावरुन आठ जणांविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी पोटघन यांचा कात्रजमधील स्वामी विवेकानंद इमारतीसमोर भेळीचा गाडा आहे. या भेळीच्या गाड्यावरुनच आरोपींसमवेत पोलिसांचे वाद झाले होते. त्यातून चार नोव्हेंबरला फिर्यादी यांच्या अंगावर कार घालण्याचा प्रयत्न केला. त्यावेळी फिर्यादीने आरोपींना ''तू माझ्या अंगावर कार का घातली'', याचा जाब विचारला होता. त्यानंतर आरोपी व त्याचे साथीदार शनिवारी(ता.9) रात्री साडे आठ वाजता फिर्यादीच्या भेळीच्या गाडीवर आले. त्यांनी फिर्यादीसह त्यांच्या कामगारास लाकडी दांडक्‍याने मारहाण केली. त्यामध्ये दोघेही गंभीर जखमी झाले. त्यानंतर आरोपींनी फिर्यादींच्या भेळीच्या गाडीची तोडफोड करुन त्यांचे 25 हजार रुपयांचे नुकसान केले. या प्रकरणाचा तपास सहायक पोलिस निरीक्षक एस.आर.चिवडशेट्टी हे करीत आहेत.