दुचाकीवरून केला तीन देशांचा प्रवास

पर्यावरण संवर्धनाबाबत जनजागृतीसाठी १२ हजार किलोमीटर अंतर केले पार
वारजे - गिरिकूजन ट्रेकिंग संस्थेतर्फे कोथरूड, कर्वेनगर, वारजे भागांत राहणाऱ्या सहा तरुणांनी दुचाकीवरून भूतान, बांगलादेश, नेपाळ या तीन देशांचा व १८ राज्यांचा प्रवास पूर्ण केला. पर्यावरण संवर्धनासाठी आखलेल्या या मोहिमेत त्यांनी दुचाकीवरून तब्बल पन्नास दिवस प्रवास करत बारा हजार किलोमीटरचा टप्पा पूर्ण केला.

गुढीपाडव्याच्या मुहूर्तावर रवींद्र पांचाळ यांच्या नेतृत्वाखाली अरुण मोरे, सुनील अभंग, रोहित ढमाले, अनिल पोकळे, गिरीश काटे हा सहा जणांचा संघ कोथरूड येथील शिवाजी महाराज पुतळा चौक येथून मार्गस्थ झाला. कोथरूड येथील किर्लोस्कर कमिन्स कंपनीत हे काम करतात. यावेळी गिरिकूजन संस्थेच्या माधवी माने, किर्लोस्कर कमिन्समधील प्रतिनिधी उपस्थित होते. या तरुणांनी संपूर्ण प्रवासात पर्यावरण संवर्धनाबाबत जनजागृती केली. पर्यावरणाचे रक्षण करा, वृक्षलागवड करा, प्लॅस्टिक वापरू नका असे संदेश देत ते नाशिक, इंदूर, लखनऊ, गोरखपूर मार्गे नेपाळला पोचले. 

या दरम्यान त्यांनी बिहारच्या एका शाळेमध्ये व नेपाळमध्ये प्लॅस्टिक संदर्भात जनजागृती केली. त्यानंतर ते सिक्कीम येथे पोचले. येथे बर्फाळ भागातून प्रवास करत त्यांनी प्लॅस्टिकचे दुष्परिणाम नागरिकांना सांगितले. पुढे या संघाने भूतान देशामध्ये प्रवेश करून तेथील थीम्पू, पारो, पूनाखा या ठिकाणी भेटी दिल्या. पुढे अरुणाचलमधील तवांग येथून बुमला पास व चायना बॉर्डरपर्यंत उणे दोन अंश तापमानात तरुणांनी आपली दुचाकी चालवली. नागालॅंडच्या दिशेने प्रवास करत काझीरंगाचे अभयारण्य पार केले. या पन्नास दिवसांच्या काळात त्यांनी ऊन, पाऊस, बर्फवृष्टी अंगावर झेलत हा प्रवास पूर्ण केला.

पर्यावरणाच्या संवर्धनासाठी आम्ही ही मोहीम आखली. पन्नास दिवसांमध्ये तरुणांनी ठिकठिकाणी जनजागृती केली. 
- दीपक मोरे, अध्यक्ष, गिरिकूजन ट्रेकिंग संस्था