मतदानाच्या दिवशीचे वेळापत्रकात बदलणार विद्यापीठाचे स्पष्टीकरण 

पुणे : लोकसभा निवडणुकीत मतदानाच्या दिवशी परीक्षा असल्यास त्या पेपरच्या वेळापत्रकात बदल करण्यात येईल, असे सावित्रीबाई फुले पुणे विद्यापीठाने जाहीर केले आहे. पुणे, नगर, नाशिक जिल्ह्यांतील मतदानाच्या कार्यक्रमाचा विचार करून संबंधित परीक्षेच्या वेळापत्रकात बदल करण्यात येणार असून, त्याबाबत येत्या दोन-तीन दिवसांत निर्णय घेण्यात येईल, असे विद्यापीठ प्रशासनाने स्पष्ट केले आहे. 

लोकसभा निवडणूक जाहीर झाल्यानंतर निवडणूक प्रक्रियेतील महत्त्वाच्या दिवशी येणाऱ्या परीक्षांच्या वेळापत्रकात मुंबई विद्यापीठ आणि डॉ. बाबासाहेब आंबेडकर मराठवाडा विद्यापीठाने बदल करणार असल्याचे सोमवारी जाहीर केले. या पार्श्‍वभूमीवर पुणे विद्यापीठातही हालचाली सुरू झाल्या आहेत. पुणे, नगर आणि नाशिक या तिन्ही जिल्ह्यांतील पुणे विद्यापीठांतर्गत घेण्यात येणाऱ्या परीक्षेतील एखादा पेपर त्या-त्या ठिकाणी होणाऱ्या मतदानाच्या दिवशी होणार असेल, तर त्या वेळापत्रकात बदल केला जाणार आहे. 

मतदानाच्या दिवशी परीक्षा आहेत का, त्यानुसार वेळापत्रकात बदल करण्यासंदर्भातील प्रक्रिया सध्या विद्यापीठात सुरू आहे. त्यामुळे येत्या दोन-तीन दिवसांत वेळापत्रकातील बदलाचे तपशील दिले जाणार आहेत. सामान्यत: मतदानाच्या दिवशी असलेल्या पेपरच्या वेळापत्रकात बदल केला जातो, असे विद्यापीठ प्रशासनाने कळविले आहे.