भाजी विक्रीसाठी परवाना सक्तीचा

Vegetable-Seller
Vegetable-Seller

पुणे - गल्लीबोळातील दुकानांमध्ये भाजी विक्री होत असल्याने शहरातील अनेक मंडया ओस पडत आहेत. त्यामुळे आता या विक्रेत्यांना भाजी विक्रीसाठी महापालिका परवान्याची सक्ती करणार आहे. याबाबतचा प्रस्ताव मंडई विभागाने तयार केला असून, महापालिकेच्या उत्पन्नात कोट्यवधी रुपयांची भर पडणार आहे. 

शहरात रोज सुमारे १ हजार ते १ हजार २०० टन भाजी, फळे, कांदा, बटाटा, लसणाची आवक होते. गुलटेकडी येथील मार्केट यार्डमधून भाजी घेऊन तिची विक्री शहराच्या विविध भागांत भाजीविक्रेते करतात. महापालिकेने शहराच्या विविध भागात १९ ठिकाणी मंडया बांधल्या असून, त्यात ३ हजार २०० गाळे आहेत. हे सर्व गाळे भाजी विक्रेते, फळ विक्रेत्यांना भाड्याने दिले आहेत.

शहरात गेल्या काही वर्षांपासून किराणा दुकानांमध्ये भाजी विक्री करण्याचे प्रमाण वाढले आहे. मार्केट यार्डमधून भाजी खरेदी करून ती दुकानांमध्ये दुप्पट-तिप्पट भावाने ग्राहकांना विकली जाते. त्यामुळे मार्केट यार्डमध्ये भाज्यांचे भाव कितीही कमी झाले तरी पुणेकरांना महागडीच भाजी खरेदी करावी लागते. 

दुकानांमध्ये भाजी विक्री केल्याने मंडया व इतर भाजी विक्रेत्यांच्या व्यवसायावर मोठा परिणाम झाला आहे. त्यामुळे मंडयांमधील अनेक विक्रेते मंडईतील गाळे सोडून रस्त्यावर येऊन भाजी विकत आहेत. यामुळे अतिक्रमण आणि वाहतूक कोंडीचाही प्रश्‍न निर्माण होत आहे. दुकानांमधील भाजी विक्री ही नागरिकांच्या सोईची असली तरी यातून महापालिकेचे उत्पन्नही बुडत आहे. महापालिकेच्या मंडईतील विक्रेत्यांकडून १९९० पासून दरवर्षी ८० रुपये परवाना शुल्क घेतले जाते. आता या शुल्कात वाढीचा प्रस्ताव तयार करण्यात आला आहे. त्यात मंडईतील विक्रेत्यांसाठी वर्षाला १ हजार, तर दुकाने, मॉल व इतर ठिकाणी भाजी विक्री करणाऱ्यांना २ हजार रुपयांचे परवाना शुल्क आकारण्याचा प्रस्ताव आहे.

महापालिकेच्या हद्दीतील दुकानांमध्ये भाजी विक्री करणाऱ्यांना महापालिकेचा परवाना घेणे आवश्‍यक आहे. त्यासाठी प्रस्ताव तयार केला असून, तो स्थायी समितीसमोर मान्यतेसाठी ठेवला जाणार आहे. त्यास मंजुरी मिळाल्यानंतर याची अंमलबजावणी सुरू होईल. 
- माधव जगताप, उपायुक्त, महापालिका

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com