Vidhansabha 2019 : कॉंग्रेसमधील इच्छुकांकडून निवडणुकीची तयारी सुरू

पुणे - विधानसभा निवडणुकीत आघाडी होणार असल्याचे गृहीत धरून, कॉंग्रेसच्या वाट्याला येणाऱ्या शहरातील आठपैकी तीन मतदारसंघांतील पक्षाच्या इच्छुकांनी जोरदार तयारी सुरू केली आहे. उमेदवारी जाहीर होण्याची वाट न पाहता कसबा, पुणे कॅंटोन्मेंट आणि शिवाजीनगरमधील इच्छुकांनी गाठीभेटींवर भर देण्यास सुरवात केली आहे.

कॉंग्रेसकडे येणाऱ्या तिन्ही मतदारसंघांत इच्छुकांची संख्या मोठी आहे. उमेदवारी जाहीर होण्यास अद्याप वेळ आहे; परंतु इच्छुकांनी आपली जोरदारपणे तयारी सुरू केली आहे. कसबा विधानसभा मतदारसंघातून अरविंद शिंदे, रवींद्र धंगेकर, कमल व्यवहारे; तर पुणे कॅंटोन्मेंटमधून माजी आमदार रमेश बागवे, सदानंद शेट्टी; शिवाजीनगरमधून मनीष आनंद, दत्ता बहिरट यांनी सध्या गाठीभेटींवर भर दिला आहे. पक्षाचे आजी-माजी सभासद, आमदार, नगरसेवक, ज्येष्ठ पदाधिकारी यांना भेटून इच्छुक असल्याचे सांगितले जात आहे.