ढिंग टांग :  ...उत्सवाचे रंगी!

ढिंग टांग :  ...उत्सवाचे रंगी!

आम्ही मतदार। आम्ही मतदार।
राज्याची मदार। खांद्यावरी।।

आमुच्या अंतरी। लोकशाही बीज।
पाच वर्षे लीज। देतो आम्ही।।

लोकांचा उच्छाव। आहे इलेक्‍शन।
त्यात तनमन। ओततो गा।।

उत्सवाचे रंगी। आम्ही गा रंगलो।
यथेच्छ घोळलो। कर्दमात।।

सभेत रंगलो। रॅलीत हिंडलो।
व्हॉट्‌सॅपी तंटलो। हिरीरीने।।

कुणी आहे भक्‍त। आणि कुणी साचे।
वाजती चमचे। उर्वरित।।

पक्षोपक्षांसाठी। खर्चली गा कुडी।
ऐसी खडाखडी। डिजिटल।।

कधी भांडलो गा। कधी गा रडलो।
आणि कोसळलो। मंचावरी।।

ओरडलो किंवा। ताणोनिया शिरा।
 मारा किंवा धरा। लेकाच्यांना।।
सोडोनिया सारे। सारे तंत्रताळ।।
बांधोनिया चाळ। पायी पायी।।

सुज्ञ म्हणितले। नका ऐसे करु।
नका गळे धरु। एकमेकां।।
नका बोलू ऐसे। वाईटसाईट।
देताना बाईट। वाहिन्यांना।।

पण ऐश्‍या काळी। शहाण्याचे बोल। 
जाती फोल फोल। इलेक्‍शनी।

जाता नाही जात। शिंचा येळकोट।
आम्हालागी व्होट। देव आहे।।

सोनियाचा दिनु। उगवला आज।
तिष्ठविले मज। पाच वर्षे।।

 मतदान आहे। अतिश्रेष्ठ दान।
त्याला आहे मान। ज्याचे व्होट।।

निवडितो आम्ही। आमुचे गा देव।
बाकी देवघेव। मागाहून।।

जरी उडदामाजी। असती काळेगोरे।
आम्ही प्रेमभरे। निवडितो।।

भले तरी देऊ। अगणित लाथा।
नाठाळाचे माथा। लावू टिळा।।

नंबरी उमेदवार। असो नामचीन।
त्याची भावभीन। भक्‍ती करु।।

लोकशाहीमाजी। तोचि खरा नर।
ज्याची फार्च्युनर। सदा पुढे।।

उठता बसता। लोकशाही जप।
प्रचार अमाप। केला हो जी।।

रंग लोकशाही। ढंग लोकशाही।
व्यंग लोकशाही। चराचरी।।

आमुच्या हाताचे। तर्जनीचे बोट।
बहुमोल व्होट। बाळगिते।।

एका दिसासाठी। लोक होती गोळा।
जणू सण पोळा। बेंदराचा।।

लागेना गे मज। दिडकीची भांग।
उच्छाव यथासांग। पार झाला।।

ऐसा गा उच्छाव। ज्याच्या नशिबाला।
तोचि धन्य झाला। नंदी म्हणे।।

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com