ढिंग टांग : स्टेचा अर्थ!

स्थळ : मातोश्री हाइट्‌स, वांद्रे.
वेळ : थबकलेली! काळ : स्तंभित!
प्रसंग : लटकलेला! पात्रे : सटकलेली!

अत्यंत चिंताग्रस्त मनस्थितीत मा. सीएमसाहेब दालनात येरझारा घालीत आहेत. एका टोकाकडून दुसऱ्या टोकाकडे...मग यू-टर्न! पुन्हा दुसऱ्या टोकाकडून पहिल्या टोकाकडे...पुन्हा यू-टर्न! असे सारखे चालू आहे. त्यांचे विश्‍वासू पीए मिलिंदोजी त्यांच्या बरोबरीने येरझारा घालीत आहेत. अब आगे...

सीएमसाहेब : (अचानक थबकून) कोण आहे रे तिकडे?
पीएसाहेब : (त्यांच्यापाठोपाठ अचानक थबकून) मीच आहे, साहेब! असा अचानक ब्रेक का मारलात?

सीएमसाहेब : (कपाळावर चेपत) शतपावलीला आम्ही तूर्त स्टे दिला आहे! काय म्हणणं आहे?
पीएसाहेब : (शांतपणे) अस्सं होय! सगळ्यांना कळवू?

सीएमसाहेब : (त्रासून) सगळ्यांना म्हंजे कोणाला?
पीएसाहेब : (गंभीरपणे) आपल्या मंत्रिमंडळाला?

सीएमसाहेब : (च्याट पडत) अरेच्चा!! मंत्रिमंडळ झालं? मला कुणी कसं सांगितलं नाही? मी मंत्रिमंडळावर परवाच स्टे दिला होता ना?
पीएसाहेब : आपल्या पक्षातल्या लोकांना तरी सांगू का?

सीएमसाहेब : (नकारार्थी मान हलवत) नको! कशाला? आज आमच्या कुठल्या मीटिंगा आहेत?
पीएसाहेब : (डायरीत बघत) बऱ्याच मीटिंगा आहेत! सार्वजनिक बांधकाम विभागाची बैठक आहे, मग सार्वजनिक आरोग्य विभागाची आढावा बैठक आहे! त्यानंतर गोरेगावची पत्राचाळ आणि कल्याण-डोम्बिवलीच्या समस्यांबाबत आढावा बैठक आहे...बऱ्याच आढावा बैठका आहेत! 

सीएमसाहेब : (खचून जात) किती आढावा घ्यायचा एका माणसानं? छे! थकलो बुवा आढावा घेऊन घेऊन!
पीएसाहेब : (खांदे उडवत) त्याला काही इलाज नाही, साहेब! आढावा घेतल्याशिवाय पुढे कसं जाता येईल?

सीएमसाहेब : (खुर्चीत मटकन बसत) या आढावा प्रकाराला स्टे देता येईल का बघा जरा!
पीएसाहेब : किती गोष्टींना स्टे द्यायचा साहेब? हाती घेतलेली प्रत्येक फाइल स्थगित केली आहे आपण! लोक आपल्याला स्थगिती सरकार म्हणायला लागले आहेत!!

सीएमसाहेब : (एकदम आठवून) त्या आरेवनातल्या कारशेडच्या कामाला स्टे दिलाय, तो कायम आहे ना?
पीएसाहेब : (ठामपणाने) एकदम पक्‍कं काम झालंय! तिथली उरलेली झाडं वाढायची आपोआप थांबली आहेत म्हणे! स्टे दिलाय ना आपण!!

सीएमसाहेब : ते एक बरं झालं! आता काय?
पीएसाहेब : (हातातल्या यादीवर खुणा करत) काल खासदारांची बैठक होती, त्यावरही स्टे दिला आपण! आता फक्‍त नागपूर अधिवेशनाची तयारी करायची आहे! तेवढं झालं की मग काम फत्ते!

सीएमसाहेब : (विचारात पडत) नागपूर अधिवेशनाला स्टे देता येईल का बघा जरा!
पीएसाहेब : (धक्‍का बसून) असं करता येणार नाही साहेब! आठवडाभराचं तर अधिवेशन आहे! विरोधक फाडून खातील! मंत्र्यांना उत्तरं देताना नाकीनऊ येतील!

सीएमसाहेब : (बिनधास्तपणे) आहेच कुठे मंत्रिमंडळ इथे! अजून खातेवाटपसुद्धा नाही!
पीएसाहेब : (सावधगिरीचा सल्ला देत) फार उशीर करू नका साहेब! खातेवाटप लौकर झालं नाही तर पब्लिकमध्ये मेसेज चांगला जाणार नाही, साहेब! 

सीएमसाहेब : (सबुरीनं घेत) करू करू, काय घाई आहे?
पीएसाहेब : (आगाऊपणाने) कारभार करायला मंत्रिमंडळ हवंच ना साहेब! आढावा बैठकींवर किती दिवस काढणार? आणि इतके स्टे कशाला द्यायचे? हो की नाही?
सीएमसाहेब : (एक पॉज घेत) त्याचं काय आहे...स्टेबल राहायचं असेल तर ‘स्टे’ला पर्याय नाही, कळलं?