मुक्‍ताफळांचे अभंग! (ढिंग टांग)

नका नका मज। ऐश्‍या हाणू लाथां।
सडकता माथा। कशापायी।।

ऐसा काय माझा। झाला अपराध।
आली कशी बाध। लोकतंत्रा।।

आम्ही हो आजाद। अभिव्यक्‍त होऊ।
वाट्टेल त्या देऊ। शिव्या शाप।।

इलेक्षन आहे। इथे सारे माफ।
सांगतो साफ साफ। निक्षून की।।

देश नव्हे, हे तो। असे न्हाणीघर।
येथे सानथोर। निर्वस्त्र की।।

मतांचियासाठी। चाले खटपट।
सारी वटवट। त्याच्यासाठी।।

अपशब्दांमिषे। अस्वस्थ इतुके।
पडती का भोके। अंगामाजी।।

समजून घ्या ना। तुम्ही सारे लोक।
वृथा नोंक झोक। कशासाठी।।

प्रेम, युद्ध आणि। किंवा निवडणूक।
येथे न काही चूक। सारे क्षम्य।।

स्वभावचि माझा। मोकळा ढाकळा।
ऐश्‍या मुक्‍ताफळां। आस्वादितो।।

आतल्या गाठीचा। नाही गा स्वभाव।
शब्दांचा चुनाव । शेलका हो।।

थोडेफार गैर। बोलोनिया गेलो।
आणि पार मेलो। सदेह की।।

मनी जे वसते। तेचि ओठी येते।
तुमचे काय जाते। एवढे गा?।।

ध्यानी असो द्यावे। ऐश्‍या इलेक्‍शनी।
माता नि भगिनी। कोणी नाही।।

नाही आई बाप। भाऊ किंवा मामा ।
पुतणे नि काका। सारे एक।।

रंग, धर्म, पंथ। जात, पोटजात।
बनवावी बात। इलेक्‍शनी।।

जैसी ज्याची वांछा। जैसे ज्याचे कर्म।
तैसे शब्दवर्म। उमटते।।

बेसुमार गाळ्या। आणि शिव्याशाप।
आम्ही आहो बाप। लोकशाही।।

ऐकून घ्यावे रे। आमुचे निमूट।
बाकी सारे झूट। आम्ही खरे।।

काहीचिया बाही। बोलिलो जरि मी।
मतांची बेगमी। ह्याचे मूळ।।

फोडोनिया घट। फाडोनिया पट।
व्हावे झटपट। प्रसिद्ध की।।

मतामतासाठी। फिरू दारोदार।
जणू की लाचार। याचक आम्ही।।

तुका म्हणे आम्हा। लावावे काजारा।
मोजून पैजारा। माराव्या हो।।

लोकशाहीसणीं। हे तो महापर्व।
मतदार सर्व। मूढ आहे।।

लायकीप्रमाणे। निवडावा नेता।
बाकी साऱ्या बाता। फुकटचि।।

जिव्हें नाही हाड। नाही कसली चाड।
त्याला करा हाड। नंदी म्हणे।।