कौन बनेगा सीएम ? (ढिंग टांग!)

Pune Editorial Article on Zenda Flag Dhing Tang
Pune Editorial Article on Zenda Flag Dhing Tang

विक्रमादित्य : (दार ढकलून बेडरूममध्ये शिरत) हाय देअर बॅब्स... मे आय कम इन? 
उधोजीसाहेब : (झोपाझोपीच्या तयारीत) नोप ! उद्या भेटू. गुडनाइट ! 
विक्रमादित्य : (चातुर्यानं) बाकी तुमचं स्पीच एकदम टॉप क्‍लास झालं हां ! 
उधोजीसाहेब : (चक्रावून) काय टॉप क्‍लास झालं? 
विक्रमादित्य : (तोंडाकडे बोटांचा पाचुंदा नेत) स्पीच ! भाषण ! तडाखेबंद बोललात तुम्ही ! एक घाव दोन तुकडे !! 
उधोजीसाहेब : (किंचित खुशालत) हां हां ते ! तुझंही छान झालं हं का !! 

विक्रमादित्य : (आत्मविश्‍वासाने) आय नो !! बट डॅड... आपण खरंच पुढल्या वेळेला निवडून येणार का? 
उधोजीसाहेब : (डोळे गरागरा फिरवत) म्हंजे काय ! अर्थातच !! 
विक्रमादित्य : (ऍकडमीकली...) कशावरून? 

उधोजीसाहेब : (उसळून) मी सांगतो म्हणून ! ह्या कमळेच्या फेकाफेकीमुळे त्रस्त झालेली जनता आता आपल्यालाच मत देणार ! लिहून ठेव आत्ताच !! स्वबळावर लढू असं ठामपणे सांगतोय, ते काही उगाच नाही !! पावणेदोनशेच्या आसपास सीटा जिंकू आपण !! मंत्रालयावर झेंडा फडकणार म्हंजे फडकणारच ! मी प्रतिज्ञाच घेतली आहे तशी !! 
विक्रमादित्य : (उत्साहात टाळी वाजवत) एक्‍सलंट !! मग माझ्याकडे एक सॉलिड आयडिया आहे ! आपण डिस्कस करू या? 
उधोजीसाहेब : (संयमाने) टुमारो करू...हं...टुमारो ! झोपा आता !! 
विक्रमादित्य : (हाताची घडी घालून) येत्या इलेक्‍शनला आपलं मंत्रालयावर झेंडा फडकवण्याचं नक्‍की आहे ना? 
उधोजीसाहेब : (उसळून) हा काय प्रश्‍न झाला? अलबत ! 
विक्रमादित्य : (कंटिन्यू...) म्हंजे पुढचा सीएम आपला असणार ना? 

उधोजीसाहेब : (दुप्पट उसळून) अर्थात ! माझ्या भाषणात तसं मी क्‍लिअरली सांगितलं आहे ! पुढचं इलेक्‍शन आम्ही जिंकणार, आमचा मुख्यमंत्रीच तिथं खुर्चीत बसणार ! ह्यात आता बदल नाही !! 

विक्रमादित्य : (ओठांचा चंबू करत) कोणाला करायचं मुख्यमंत्री? 
उधोजीसाहेब : (गडबडून) आँ? मी सांगीन तो होईल मुख्यमंत्री !! आणि इतक्‍या लौकर ठरवण्याची काय घाई आहे? 
विक्रमादित्य : (पोक्‍त सुरात) आधी सगळं ठरलेलं असलं म्हंजे बरं ! प्लानिंग इज हाफ सक्‍सेस !! 
उधोजीसाहेब : (गोंधळून जात) नावाचा अजून घोळ आहे रे ! झेंड्याचं नक्‍की आहे... सीएमचंही नक्‍की आहे... पण अजून कोणाला तिथं बसवायचं? हे काही समजत नाही... काहीतरी केलं पाहिजे... केलं पाहिजे काहीतरी... पाहिजे काहीतरी केलं...काय करावं? काय कराव? कॅक्रावं? अं...अं...अं... 

विक्रमादित्य : (काळजीच्या सुरात) बॅब्स... काही होतंय का? कुछ लेते क्‍यूं नहीं? 
उधोजीसाहेब : (भानावर येत) नावबिव कुछ नाही ! मी सांगीन तेच नाव ! कुणीही मुख्यमंत्री म्हणून बसला तरी राज्य माझंच असणार आहे !! कळलं? 

विक्रमादित्य : (आग्रह करत) असं कसं? आधी नाव पाहिजे ! मागल्या खेपेला त्या कमळवाल्यांनीही आधी नाव ठरवलं ! मग झेंडाबिंडा !! मुख्यमंत्री आधी जाहीर करून मग निवडणुका लढवायचा आता नवा ट्रेंड आहे ना? मग वी मस्ट फॉलो दॅट !! 

उधोजीसाहेब : (पुन्हा गोंधळून) तेही खरंच म्हणा ! पण काय घाई आहे? एकदाचा तो झेंडा फडकवला की मग मी सुटलो !! मग मात्र मी आराम करणार आहे !! 
विक्रमादित्य : (एक डेडली पॉज घेत)...तुम्हाला आरामच करायचा आहे ना? मग मी काय म्हंटो... माझं नाव जाहीर करून टाका ना? कशी वाटतेय आयडिया? 

-ब्रिटिश नंदी 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com