ढिंग टांग :  बांधावरचे अभंग!

ढिंग टांग :  बांधावरचे अभंग!

बरे जाले देवा। केले कास्तकार।
जालो निराधार। तुझ्या कृपें।।

संपता संपेना । नशिबाचा भोग।
शेती हाचि रोग। दुर्धरचि।।

हजार हातांनी। देशी तूच मशी।
काढोनिया घेशी। हातोहात।।

येवढा प्रलय । का रे धाडिलासी।
झालो वनवासी । रातोरात ।।

होत्याचे नव्हते। झाले एका दिस ।
जीव कासावीस। झाला झाला।।

वाहोनिया गेले। घर नि शिवार।
नुरे पारावार । दु:खालागी ।।

कोसळली वीज । फुटला गे मेघ ।
पाण्याचा आवेग । मृत्यूसम ।।

पर्जन्याचे पाय । उलटे की काय ।
केले धरणीठाय । जीव मात्र ।।

देशभरातील इतर बातम्या वाचण्यासाठी येथे क्लिक करा

काय करू आता? । किती पिटू छाती।
आयुष्याची माती । झाली देवा।।


बैसलो रिकामा । बडवीत भाळ ।
नांगराचा फाळ । घरावरी ।।

अस्मानीचा शाप । भोविन्नला मज ।
नुरे काही वज । जगण्याला ।।

थिजला काळोख। साकळला नेत्री।
दिवस नि रात्री। एक झाल्या।।

पर्जन्य पिशाच्च । यथेच्छ नाचले ।
शिवार झोपले । कायमचे ।।

नशिबाला बोल । बैसलो लावीत ।
कपाळाला हात । अहर्निश ।। 

आणि अचानक । माझ्या बांधावर।
कुणि अवतार । प्रकटले ।।

झाली धावाधाव । उडाली झुंबड ।
सर्कारी गडबड । शेतामाजी ।।

जगभरातील इतर बातम्या वाचण्यासाठी येथे क्लिक करा


दूर आभाळात। दिसले चॉपर ।
त्यातूनी ईश्वर । उतरले ।।

रडू नको भावा । नको सोडू धीर।
तूचि खरा वीर । दौलतीचा ।।

मंजुळ स्वरांनी। बोले घुणघुणा ।
मैं हू ना, मैं हू ना। ऐसे काही ।।

धावोनिया आला । बांधावर भाऊ।
म्हणे, देऊ देऊ । रोख साह्य ।।

सेल्फी, फोटो छान । टीव्हीचे क्‍यामेरे।
उद्‌ध्वस्त शिवारे। बहरली ।।

पडियले पार । सारे यथासांग।
झाली पांगापांग । लगोलग ।।

ओल्या दुकाळाची। धरोनिया पाठ ।
कोरडा सुकाळ । दिलाशांचा ।।

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com