ढिंग टांग : भक्तश्रेष्ठ येती घरा...!

आनंदाचे डोहीं । आनंद तरंग ।

आनंदाचा रंग । भक्तश्रेष्ठ ।।

भक्तश्रेष्ठ येती घरा । तोचि दिवाळी दसरा ।

बाकी सारे विसरा । पळभर ।।

सोनियाचा दिस । उगवला क्षितीजी ।

भक्तश्रेष्ठ नमोजी । आले येथ ।।

यावे यावे तुम्ही । द्यावे गा दर्शन ।

तेणे माझे नयन । तृप्त होती ।।

आम्ही आहो ऐसे । भक्तांचेचि भक्त ।

तुम्ही अनभिषिक्त । भक्तश्रेष्ठ ।।

संतांच्या दर्शना । आलां तुम्ही वेगें ।

आम्ही आगेमागे । तुमच्या हो ।।

भक्तिभाव नाम । उघडली पेठ ।

धरिली गा वेठ । तुम्हाचरणी ।।

संतांच्या भूमीत । भक्तांचीच दाटी ।

वाट पाहीं दिठी । भक्ताचीच ।।

भक्तिसागरीं या । उसळल्या लाटा ।

भक्तिचाच साठा । उधळला ।।

जगत्गुरुभेटी । आले गा साक्षात ।

घेतला लक्षात । लोकभाव ।।

भक़्तश्रेष्ठासाठी । सजे देवस्थान ।

त्यालाचि गा मान । अतिथीचा ।।

उभारा जनहो । गुढ्या नि तोरणे ।

फिटेल पारणे । आयुष्याचे ।।

भक्तश्रेष्ठांसाठी । चोख बंदोबस्त ।

चौक्या दरोबस्त । नामजाद ।।

कृष्णवस्त्र कोणी । लेऊ नये आज।

धरा काही लाज । मंगलदिनी ।।

पाण्याची बाटली । खाऊ च्याऊ माऊ ।

नका नका नेऊ । मांडवात ।।

पोलिसांचे श्वान । पोलिस पथक ।

किंवा धातुशोधक । ठेवी नजर ।।

भक्तश्रेष्ठासाठी । थोडे करा सहन ।

त्याने मनभावन । दर्शन मिळे ।।

स्वच्छ असो द्यावी । संतांचीच भूमी ।

विकासाची हमी । भक्त देई ।।

आले आले देखा । ठेवा भाळावरी हात ।

देखा हो नभात । विमान आले ।।

देखणे वायूयंत्र । गरगरत आले ।

क्षणी स्थिरावले । चराचरीं।।

चॉपरची पाती । फिरती भिंग भिंग।

जाहले लँडिंग । सुखरुप ।।

भक्तश्रेष्ठ जेव्हा । अवतरले भूवरी ।

आनंद ओवरी । हसली गा ।।

तेज:पुंज मुद्रा । भाळी आहे टिळा।

तुळशीमाळ गळा । काय रुप! ।।

बोलिले ते अमृत । मुखी संतवाणी ।

आनंदाची धाणी । ओतप्रोत ।।

देखता ती मूर्त । वेडावले जन ।

भक्तश्रेष्ठ जाण । तोचि होय ।।

शब्दांचीच रत्ने । शब्दांचे भांडार ।

पण कांदाभाकर । पावे कैसी? ।।

भक्तश्रेष्ठा, तुझा । कृपालाभ व्हावा ।

द्यावा परतावा । जीएसटीचा ।।

भेदाभेद आहे । खरा अमंगळ ।

त्यावीण हा देश । चालो द्यावा ।।

एवढे मागणे । लई न वाटावे ।

मागणे जीवेभावे । करीतसे ।।