चेतना तरंग
प्रत्येक सजीवाला आनंदी व्हायचे असते. पैसा असो, अधिकार असो किंवा कामवासना हे सगळे तुम्हाला आनंद मिळवण्यासाठीच हवे असते. काही लोक दु:खात सुद्धा मजेत असतात, कारण त्यातून त्यांना आनंद मिळत असतो!
आनंद मिळवण्यासाठी आपण काही तरी शोधत असतो, पण ते मिळाल्यावरही आपण आनंदी नसतो. एखाद्या शाळकरी मुलाला वाटते की, तो महाविद्यालयामध्ये गेल्यावर त्याला अधिक मोकळीक मिळेल आणि मग तो आनंदी होईल. तुम्ही एखाद्या महाविद्यालयीन मुलाला विचारले की, तो आनंदी आहे का? यावर तो उत्तर देतो नोकरी मिळाल्यावर मी आनंदी होईल. नोकरी-व्यवसायात स्थिरस्थावर झालेली व्यक्ती आयुष्यात चांगला जोडीदार मिळाल्यावर आनंदी होईल, असे म्हणेल. त्याला त्याचा जोडीदार मिळतो, आता त्याला आनंदी होण्यासाठी एक मूल हवे असते. मुले असलेल्यांना विचारा, ते आनंदी आहेत का? ‘मुले चांगले शिक्षण घेऊन मोठी होऊन आपल्या पायावर उभी राहिल्याशिवाय आनंदी कसे होता येईल?’ असा प्रश्न ते विचारतील. निवृत्तांना तरुणपणीचे दिवस सुखाचे वाटतात. सगळे आयुष्य भविष्यात कधीतरी मिळणाऱ्या आनंदाची तयारी करण्यातच निघून जाते. आतून आनंदी असण्याची किती मिनिटे, किती तास, किती दिवस तुम्ही घालवले आहेत? तेवढेच क्षण तुम्ही खरे आयुष्य जगला आहात. आयुष्याकडे पाहण्याच्या दोन पद्धती आहेत. एक म्हणजे, काहीतरी विशिष्ट ध्येय साध्य केल्यानंतर मी आनंदी होईन. दुसरे म्हणजे काहीही झाले तरी मी आनंदीच आहे. तुम्हाला कोणत्या प्रकारचे आयुष्य जगायचे आहे? आयुष्य हे ८० टक्के आनंद आणि २० टक्के दु:ख असते. पण आपण या २० टक्क्यालाच धरून बसतो आणि त्याचे २०० टक्के करतो! आपण असे मुद्दाम करत नाही, ते आपोआप होते. या जगात सगळे काही नेहमीच अगदी अचूक असू शकत नाही. अगदी उदात्त, उत्तम, श्रेष्ठ अशा कृतीतही काही त्रुटी असतात. ते अगदी साहजिक आहे. दुर्दैवाने आपल्या मनाची वृत्ती अशी असते की, त्या त्रुटींनाच पकडायचे आणि घट्ट धरून ठेवायचे. आणि या सगळ्यात आपले मनस्वास्थ्य बिघडते.
सकाळ'ला सोशल मीडियावर लाईक करा :
'सकाळ' फेसबुक : @SakalNews
'सकाळ' ट्विटर : @eSakalUpdate
इन्स्टाग्राम : @esakalphoto
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.