धनगर आरक्षणासाठी खंडाळा तहसीलदार कार्यालयासमोर "ढोल बजाओ' आंदोलन

खंडाळा (जि. सातारा) : धनगर समाजाला एसटी प्रवर्गात आरक्षण मिळावे, यासाठी खंडाळा तालुका धनगर आरक्षण कृती समितीकडून शिवाजी चौक ते तहसीलदार कार्यालयापर्यंत ढोल-ताशा व भंडाऱ्याची उधळण करत मिरवणूक काढून तहसीलदार दशरथ काळे यांना निवेदन दिले. धनगर एसटी आरक्षण अंमलबजावणी करण्यासाठी येथे तालुक्‍यातील धनगर समाजबांधवांनी तहसीलदार कार्यालयासमोर "ढोल बजाओ, सरकार जगाओ' आंदोलन करण्यात आले.

या वेळी जिल्हा परिषदेचे माजी समाजकल्याण सभापती आनंदराव शेळके, पंचायत समितीचे माजी सभापती रमेश धायगुडे, बापूराव धायगुडे, ऋषिकेश धायगुडे, ऍड. सचिन धायगुडे, ऍड. वैभव धायगुडे, सचिन शेळके, हणमंतराव शेळके, जिजाबा काळे, म्हस्कुआण्णा शेळके, अशोक धायगुडे, शामराव धायगुडे व धनगर समाजाचे प्रतिनिधी उपस्थित होते.

श्रमिक मुक्ती दलाचे एकाच दिवशी गावागावांत आंदोलन 

शासन दप्तरी धनगर व धनगड या शब्दाचा खेळ करून धनगर समाजाला आरक्षणापासून वंचित ठेवले आहे. त्यामुळे शासनाने त्वरित अध्यादेश काढून आरक्षण द्यावे, याचबरोबर आरक्षणासंदर्भात मोर्चावेळी दाखल झालेले गुन्हे मागे घ्यावेत, आरक्षण आंदोलनावेळी आत्महत्या केलेल्या कुटुंबातील एकाला शासकीय नोकरी मिळावी तसेच जाहीर केलेला एक हजार कोटींचा निधी द्यावा व मेंढपाळांना संरक्षण मिळावे आदी मागण्याही निवेदनाद्वारे करण्यात आल्या आहेत.

साताऱ्यात युवकांनी एटीएममधून चाेरले दोन लाख रुपये
 
दरम्यान, शिवाजी चौक येथून धनगर समाजातील नागरिकांनी एकत्र येऊन, ढोल-ताशांच्या निनादात तसेच भंडाऱ्याची उधळण करून तहसील कार्यालयापर्यंत धनगर आरक्षणासाठी मिरवणूक काढली. पंचायत समिती आवारातील डॉ. बाबासाहेब आंबेडकर यांच्या प्रतिमेस पुष्पहार अर्पण केले. यानंतर कोरोनाच्या पार्श्वभूमीवर तहसीलदार कार्यालयातील प्रवेशद्वारावर तहसीलदार दशरथ काळे यांना धनगर आरक्षण कृती समितीकडून निवेदन देण्यात आले.

Edited By : Siddharth Latkar