कऱ्हाड एसटी आगारात इंधन बचत मोहीम सुरू

कऱ्हाड : येथील एसटी आगारात इंधन बचत मोहीम राबवण्यात येत आहे. त्याचा प्रारंभ आगारप्रमुख विजयराव मोरे यांच्या हस्ते झाला. टिळक हायस्कूलचे उपप्राचार्य धनाजीराव देसाई, उपशिक्षक भरत कदम, कार्यशाळा अधीक्षक सुप्रिया पाटील, स्थानकप्रमुख बिस्मिल्ला सय्यद, वाहतूक निरीक्षक किशोर जाधव, वैभव साळुंखे, वाहतूक नियंत्रक अनिल सावंत, मन्सूर सुतार, कृष्णत पवार उपस्थित होते.

आगारप्रमुख श्री. मोरे म्हणाले, ‘‘इंधन बचत ही काळाची गरज असून प्रत्येक चालकाने त्यावर लक्ष केंद्रित करून प्रवासी वाढ करून कर्मचाऱ्यांचे आरोग्य, प्रवासी सुरक्षितता जपावी.’’ भरत कदम यांनी इंधन बचतीविषयी माहिती दिली. उपप्राचार्य देसाई, सुप्रिया पाटील यांनी मनोगत व्यक्त केले. सय्यद यांनी आभार मानले.