कर्जासाठी फसवणाऱ्या मार्डीतील युवकास अटक; मिरज पोलिसांची कामगिरी

प्रवीण जाधव
Friday, 15 January 2021

मिरज शहर पोलिस ठाण्यातील संजय येवले या गुन्हा अन्वेषण शाखेतील पोलिस कर्मचाऱ्याच्या तत्परतेमुळे रमेश निकम हा संशयित भामटा पोलिसांच्या हाती लागला.

मिरज​ : बोगस कंपनीद्वारे कर्ज मिळवून देण्यासाठी ऑनलाइन पद्धतीने फसवणूक करणाऱ्यास मिरज शहर पोलिसांनी केवळ 24 तासांत अटक केली. रमेश नाना निकम (वय 32, रा. मार्डी ता. माण) असे संशयिताचे नाव आहे. त्याच्याकडून फसवणुकीची रक्कमही हस्तगत करण्यात आली आहे. 

मिरज शहर पोलिस ठाण्यातील संजय येवले या गुन्हा अन्वेषण शाखेतील पोलिस कर्मचाऱ्याच्या तत्परतेमुळे हा संशयित भामटा पोलिसांच्या हाती लागला. मिरज शहरातील बोलवाड रस्त्यावर सचिन नायकू बरगाले यांचे खत विक्रीचे दुकान आहे. त्याचा फोन नंबर घेऊन रमेश निकम याने त्यांना कर्ज मिळवून देण्यासाठी व्यावसायिक स्वरूपात मदत करण्याचा प्रस्ताव दिला. त्यासाठी आपण लेंडिग मार्क या कंपनीची स्थापना केल्याचीही बतावणी केली.

कोरेगावात जनावरांच्या दवाखान्यात डॉक्‍टर झालेत कंपाउंडर!  

बरगाले यांच्याशी सातत्याने संपर्क साधून व्यवसायासाठी रमेशने 14 लाखांचे कर्ज मिळवून देण्याचे आमिष दाखविले. त्यासाठी बॅंकेच्या अधिकाऱ्यांना कमिशन द्यावे लागेल. ही रक्कम आपल्या मध्यस्थीनेच द्यावी लागेल, असे सांगून त्यासाठी निकमने स्वतःचा बॅंकेतील खाते नंबरही दिला. याच खात्यावर एक लाख आठ हजार 880 रुपयांची रक्कम स्वीकारली. हा सगळा व्यवहार करताना रमेशने वापरलेल्या मोबाईल नंबरच्या आधारे पोलिसांनी या ठकसेनास ताब्यात घेतले. त्याच्याकडून एक लाख आठ हजार 880 रुपयांची रक्कम हस्तगत केली. याबाबत मिरज शहर पोलिस ठाण्यात नोंद झाली आहे.

वडूज नगरपंचायतीत सभापतींच्या निवडी जाहीर  

संपादन : बाळकृष्ण मधाळे


स्पष्ट, नेमक्या आणि विश्वासार्ह बातम्या वाचण्यासाठी 'सकाळ'चे मोबाईल अॅप डाऊनलोड करा
Web Title: Satara Crime News Miraj Police Arrested A Youth From Mardi