बाळ दगावल्याचं दु:ख 'त्यांनी' कसंबसं पचवलं...त्यात नियतीची आणखी एक खेळी...पण अखेर

नाशिक : बाळ जन्माला येण्यापूर्वीच दगावल्याचं दुःखही आम्ही नवरा-बायकोने पचवलं होतं...त्यातून कसंबसं स्वत:ला सावरलं अन् त्यात कोरोनाचा आघात...दोघेही मनोमन हादरलो. उपचारानंतर माझा अहवाल निगेटिव्ह आला; पण पत्नीचा दुसरा अहवालही पॉझिटिव्ह...संकटामागून संकट अन् अखेर "हम साथ साथ है'चाच धीर मिळाली.

पत्नीचा दुसरा अहवालही पॉझिटिव्ह

मी प्रमोद मंडलिक मालेगाव शहर पोलिस ठाण्यात ड्यूटीवर असताना 15 एप्रिलच्या सुमारास प्रकृती बिघडली. तेव्हा सलाइन लावून ड्यूटी सुरू होती. ती सिरींज हाताला असल्याने अनेकजण संशयाने पाहात. 23 एप्रिलला रुग्णालयात दाखल झालो. दुसऱ्या दिवशी माझा व पत्नी माधुरी दोघांचा कोरोना तपासणी रिपोर्ट पॉझिटिव्ह आला. दोघेही मनोमन हादरलो. मात्र पोलिस खात्यात असल्याने संकटावर मात करण्याची सवय होती. शिवाय याआधी आमचं बाळ जन्माला येण्यापूर्वीच दगावल्याचं दुःखही आम्ही पचवलं होतं. रुग्णालयात पत्नी शेजारी असल्याचा वेगळाच दिलासा होता. एकमेकांना आधार देत असतानाच माझ्या छातीत पाणी झालं. उपचारानंतर माझा अहवाल निगेटिव्ह आला; पण पत्नीचा दुसरा अहवालही पॉझिटिव्ह आला. छातीत पाणी झाल्यानं त्यावर उपचार सुरूच होते.

हेही वाचा > पोलिसांचा फिटनेस कळणार थेट कंट्रोल रूमला?...वाचा सविस्तर

त्यातच 7 मेस पत्नीला दुसऱ्या रुग्णालयात हलवण्यात आलं. आमची काही काळासाठी जणू ताटातूट झाली. फोनवर वेळीवेळी बोलून एकमेकांच्या तब्यतेची चौकशी करीत होतो. आमच्या कुटुंबात सदस्य तसे तीस; पण ते जिल्ह्याबाहेर. या काळात मोठी मदत झाली ती मित्रपरिवाराची. पोलिस प्रशासनाकडून अधूनमधून चौकशी केली जायची. पाण्याची बॉटल, फळ यायची. डोक्‍यात सतत सकारात्मक विचार ठेवायचा प्रयत्न करीत होतो. डॉक्‍टरांनी सांगितलेली पथ्ये पाळत होतो. 

हेही वाचा > 'मी नाही, माझ्यातल्या खेळाडूने केले कोरोनाला क्लिन बोल्ड!'

अखेर 18 मेस आम्ही दोघेही ठणठणीत झालो. त्यानंतर गावी कुटुंबीयांपासून दूर गावाबाहेर क्वारंटाइन झालो. नंतर शनिवारी (ता. 30) एक तासापूर्वी घरात पाऊल टाकल्याचा वेगळाच आनंद झाला अन्‌ "सकाळ'मधून ख्यालीखुशाली विचारण्यासाठी फोन आला. आपल्या संघर्षाची कोणीतरी दखल घेतंय, ही बाब खूपच दिलासा देणारी आहे. आता मनोबल वाढलंय. घरातही सात दिवस स्वतःला क्वारंटाइन करून घेणार आहोत. 

हेही वाचा > कोरोनापेक्षा बदनामीच्या विषाणूशी 'तो' वेदनादायक संघर्ष...पण, आम्ही लढलोच!