देवळाली टीडीआर घोटाळा चौकशीला सुरुवात; मुद्रांक महानिरीक्षकांमार्फत दराची होणार तपासणी 

नाशिक - महापालिकेचे शंभर कोटी रुपयांचे नुकसान करण्यास कारणीभुत ठरलेल्या देवळाली शिवारातील सर्वे क्रमांक २९५ सह रेल्वे साठी महापालिकेने देण्यात आलेल्या टिडीआर घोटाळ्याच्या चौकशीला समितीला मुहूर्त सापडला असून पहिल्या बैठकी मध्ये पुणे येथील मुद्रांक नोंदणी महानिरीक्षकांकडून टीडीआर दराची पडताळणी करण्याचा निर्णय घेण्यात आला. त्यासंदर्भातील पत्रव्यवहार करण्यात आला आहे. 

देवळाली शिवारातील सर्वे क्रमांक २९५/१ मधील आरक्षण क्रमांक २२० व २२१ या आरक्षित जागेचा टीडीआर देताना जागा बदल दर्शविण्यात आला होता. सिन्नर फाटा येथे जागा असताना मोक्याच्या बिटको चौकातील जागा दर्शविण्यात आली होती. सिन्नर फाटा येथील जागेचा दर रेडीरेकनर नुसार ६,९०० रुपये प्रतिचौरस मीटर तर बिटको चौकातील दर २५,१०० प्रति चौरस मीटर असताना अधिक किमतीचा टीडीआर देण्यात आला. यातून महापालिकेला शंभर कोटी रुपयांचा भुर्दंड बसल्याचा आरोप करण्यात आला होता. तसेच सन २००९ ते २०१२ या कालावधी मध्ये राष्ट्रीय महामार्गासाठी भुसंपादनाचे अकरा प्रस्ताव सादर करण्यात आले होते. त्यातील आठ प्रस्ताव रेल्वेसाठी भुसंपादनाचे होते. रेल्वेसाठी भुसंपादन करायचे असल्याने रेल्वे प्रशासनानेंच मोबदला देणे बंधनकारक असताना तो मोबदला महापलिकेने अदा केल्याचा आरोप शिवसेनेचे नगरसेवक सुधाकर बडगुजर यांनी केला. यासंदर्भात नगरविकास मंत्री एकनाथ शिंदे यांच्याकडे त्यांनी लेखी तक्रार दिल्यानंतर शासनाने चौकशीचे आदेश दिले. त्यानुसार आयुक्त कैलास जाधव यांनी चौकशीसाठी अतिरिक्त आयुक्त सुरेश खाडे यांच्या अध्यक्षतेखाली चौकशी समिती नेमली. नगररचना विभागाचे सहाय्यक संचालक अंकुश सोनकांबळे, मुख्य लेखा परिक्षक बोधीकिरण सोनकांबळे, मुख्य वित्त व लेखाधिकारी नरेंद्र महाजन, अधिक्षक अभियंता संदीप नलावडे यांचा समितीत सदस्य म्हणून समावेश केला.  

हेही वाचा > क्रूर नियती! नवरात्रीच्या पहिल्याच दिवशी देवीभक्ताचा दुर्देवी अंत; कुटुंबियांचा आक्रोश 

स्थळपाहणीसह दर मागविणार 

समितीने सोमवारी सिन्नर फाटा येथील आरक्षित जागेची पाहणी केली. त्यानंतर बुधवारी (ता. २१) बैठक घेतली. यापुर्वीच्या समितीने केलेल्या अहवालाची फाईल तपासली. सन १९९३ व २०१७ मध्ये जाहीर करण्यात आलेल्या शहर विकास आराखड्यात नमुद करण्यात आलेल्या आरक्षणांची पडताळणी करण्यात आली. देवळाली शिवारतील सर्वे क्रमांक २९५ च्या आरक्षणासंदर्भात जागा मालकांना देण्यात आलेल्या टिडीआरच्या दराची तपासणी करण्यासाठी मुद्रांक महानिरीक्षकांशी पत्रव्यवहार करण्यात आला. 

हेही वाचा > मध्यरात्रीस खेळ चाले! गायींना भुलीचे औषध देऊन तस्करी; महागड्या गाड्यांचा वापर