जाखोरी, राहुरी शिवारात दोन बिबटे जेरबंद 

नाशिक : नाशिक तालुक्यातील जाखोरी व भगूरजवळील राहुरी गावाच्या शिवारात लावलेल्या पिंजऱ्यात बुधवारी (ता. ५) पहाटे दोन बिबटे जेरबंद झाले आहेत. आतापर्यंत वन विभागाला दहा बिबटे जेरबंद करण्यास यश मिळाले आहे. यादरम्यान पकडण्यात आलेले सात बिबटे बोरिवली येथील राष्ट्रीय उद्यानात पाठविण्यात आले आहेत. 

राहुरी येथील संतोष सानप यांच्या मळ्याजवळ पेरूच्या बागेत लावलेल्या पिंजऱ्यात पहाटे बिबट्या जेरबंद झाला. सरपंच व पोलिसपाटील स्वाती पानसरे यांनी वन विभागाला पाचारण केले आणि परिमंडळ अधिकारी मधुकर गोसावी व त्यांच्या पथकाने बिबट्याला ताब्यात घेतले. 

हेही वाचा > पुन्हा धाकधूक वाढली! मालेगावमध्ये पन्नास बाधितांचा समावेश.. प्रशासकीय यंत्रणा सावध

जाखोरी शिवारात रविवारी (ता.२) दराडे फार्मजवळ पिंजरा लावण्यात आला होता. बुधवारी पहाटे त्यात बिबट्या जेरबंद झाल्याचे निवृत्त विभागीय वनाधिकारी दराडे यांनी माहिती दिली. त्यानंतर वनपरिक्षेत्र अधिकारी विवेक भदाणे यांच्या मार्गदर्शनाखाली बचाव पथकाचे वनपाल मधुकर गोसावी, वनरक्षक गोविंद पंढरे यांनी बिबट्याला ताब्यात घेतले. दोन्ही बिबट्यांना गंगापूर रोपवाटिका येथे ठेवण्यात आले आहे. 

हेही वाचा > "माझ्या पत्नीच्या मृत्यूस कारणीभूत 'त्या' डॉक्टरांवर मनुष्यवधाचा गुन्हा दाखल करा"...पतीचे मनपा आयुक्तांना पत्र

आतापर्यंत दहा बिबटे जेरबंद
आतापर्यंत नाशिक तालुक्यातून जुलै व ऑगस्टमध्ये दहा बिबट्यांना जेरबंद करण्यास वन विभागाला यश आले. नाशिक तालुक्यातील बिबट्यांनी नागरिकांवर हल्ले केले. यात काही जणांचा मृत्यू, तर बालके जखमीही झाले आहेत. पण बिबटे जेरबंद होत असल्याने नागरिक समाधान व्यक्त करत आहे.

संपादन- रोहित कणसे