देवनदीचे रौद्ररुप आणि तरुणाची मृत्यूशी झुंज ; ग्रामस्थांच्या डोळ्यादेखत घडला थरार

नाशिक / सिन्नर : त्यावेळी बाजारातील अनेकजण नदीपात्राकडे धावले. काहींनी नदीपात्रात उड्या मारल्या, तर काहीजण प्रवाहाच्या दिशेने धावले. मात्र, काही क्षणातच होत्याचे नव्हते झाले. देवनदीचे रौद्ररुप आणि तरुणाची मृत्यूशी झुंज असा अंगावर काटा आणणारा थरार ग्रामस्थांच्या डोळ्यादेखत सुरू होता.बुधवारी (ता. २३) दुपारी चारच्या सुमारास ही घटना घडली. काय घडले वाचा...

देवनदीचे रौद्ररुप आणि तरुणाची मृत्यूशी झुंज

वडांगळी व खडांगळी (ता. सिन्नर) या गावांना जोडणारा देवनदीवरील पूलावरून ये- जा सुरु होती. जोरदार पाऊस आणि नदीने अचानक घेतले रौद्ररुप.. साधारण २२ ते २५ वर्षे वयाचा तरुण वडांगळी येथे आठवडे बाजारासाठी येत होता. पुलावरून वाहत असलेल्या पाण्याचा वेग अधिक असल्याने तो नदीपात्रात ओढला गेला. त्याने मदतीसाठी आरडाओरड केली असता, बाजारातील अनेकजण नदीपात्राकडे धावले. काहींनी नदीपात्रात उड्या मारल्या, तर काहीजण प्रवाहाच्या दिशेने धावले. मात्र, पाण्याचा वेग अधिक असल्याने तरुण वाहून गेला. पायी नदी ओलांडणारा हा तरुण स्थानिक असावा किंवा सोंगणीच्या कामासाठी पेठ परिसरातून आलेल्या मजुरांपैकी असावा, असा अंदाज व्यक्त होत आहे. पुलाच्या खालच्या बाजूला देवना बंधारा असून, त्याचे खोलीकरण करण्यात आले आहे. शिवाय अवैध वाळू उपशामुळे नदीपात्रात खोलवर खड्डे आहेत. त्यामुळे त्या परिसरात कोणीही जायला धजावले नाही. 

हेही वाचा > "अक्राळविक्राळ रात्री भेदरलेल्या अवस्थेत मुलाबाळांसह घर सोडले...; विटावेच्या अनिल पवारांंची थरारक आपबिती

शोध सुरूच..

देवनदीचा पूल ओलांडत असताना एक २२ ते २५ वर्षे वयाचा तरुण वाहून गेला. सायंकाळी उशिरापर्यंत संबंधित तरुणाची ओळख पटली नसल्याचे स्थानिकांचे म्हणणे आहे. दरम्यान, या प्रकाराबद्दल ग्रामस्थांनी तहसीलदार राहुल कोताडे, एमआयडीसी पोलिस ठाण्याचे निरीक्षक अशोक रहाटे यांना माहिती दिली. वाहून गेलेल्या तरुणाच्या शोधासाठी जिल्हा आपत्ती व्यवस्थापन कक्षाच्या चांदोरी येथील जीवरक्षक पथकास पाचारण करण्यात आले. मात्र, अंधार पडू लागल्याने हे पथक पोचू शकले नाही. त्यामुळे गुरुवारी (ता. २४) शोधमोहीम राबविण्यात येणार असल्याचे पोलिसांनी सांगितले. 

हेही वाचा > गुजरातमध्ये गोळ्या लागलेल्या जयची मृत्यूशी झुंज; कुटुंबीयांची मदतीची याचना