स्मशानभूमीत काटेरी झाडांची साफसफाई

शहादा (नंदुरबार) : जयनगर (ता. शहादा) येथे उभादगड रस्त्याला असणाऱ्या गावातील अमरधाम व पारधी समाजाच्या स्मशानभूमी परिसरात महात्मा फुले युवा मंचचे अध्यक्ष ईश्वर माळी यांनी स्वखर्चातून काटेरी झुडपांची साफसफाई केली.

म्हैस नदीकाठी असलेला हा परिसर काटेरी झुडपे वाढल्यामुळे हा परिसर नयनरम्य दिसण्यासाठी वृक्ष लागवड करता येत नव्हती. श्री. माळी हे दरवर्षी जयनगरसह परिसरात हजारो वृक्षांची लागवड करीत असतात. तसेच त्यांचे संवर्धन करण्यासाठी ते नेहमी प्रयत्नशील असतात याचाच भाग म्हणून या वर्षी त्यांनी जयनगर येथील अमरधामजवळ साफसफाई केली आहे. माजी सरपंच व विद्यमान ग्रामपंचायत सदस्य छगनराव पारधी, ग्रामपंचायत सदस्य तुळशीराम पारधी, माजी उपसरपंच संदीप माळी, आदिवासी पारधी महासंघ नंदुरबार जिल्हा अध्यक्ष मोहन पारधी, जगन पारधी, विनोद पारधी आदी उपस्थित होते.