प्रा. डॉ. सतीश मस्के यांना राज्यस्तरीय जीवनगौरव पुरस्कार प्रदान

निजामपूर-जैताणे (धुळे) : औरंगाबाद येथील बोधी ट्री एज्युकेशनल फाऊंडेशन व जीवनगौरव सार्वजनिक वाचनालयातर्फे पिंपळनेर (ता. साक्री) येथील कर्मवीर आ. मा. पाटील वरिष्ठ महाविद्यालयाचे मराठी विभागप्रमुख  प्रा. डॉ. सतीश मस्के यांना नुकतेच राज्यस्तरीय 'जीवनगौरव' पुरस्काराने सन्मानित करण्यात आले.

मराठवाडा महसूल शिक्षण प्रबोधिनी सभागृहात डॉ. बाबासाहेब आंबेडकर मराठवाडा विद्यापीठाचे माजी उपकुलसचिव प्रा. डॉ. देगांवकर, सामाजिक कार्यकर्ते जालिंदर शेंडगे, संपादक रामदास वाघमारे आदींच्या हस्ते हा पुरस्कार प्रदान करण्यात आला. प्रा. डॉ. सतीश मस्के यांनी केलेल्या सामाजिक, साहित्यिक व शैक्षणिक क्षेत्रातील कार्याची दखल घेऊन हा पुरस्कार देण्यात आला.

यापूर्वी डॉ. मस्के यांना चार राज्यस्तरीय पुरस्कार मिळाले आहेत. ते विविध वृत्तपत्रात लेखन करत असून व्याख्यानाच्या माध्यमातून समाजप्रबोधन करतात. त्यांची दोन पुस्तकेही प्रकाशित झाली आहेत. राज्यस्तरीय व राष्ट्रीय स्तरावरील विविध चर्चासत्रात त्यांनी अनेक शोधनिबंध सादर केलेले आहेत. विविध सामाजिक चळवळीत त्यांचा सक्रीय सहभाग असतो. 'जीवनगौरव' मासिकाचे ते सहसंपादक असून उमवि राष्ट्रीय सेवा योजनेचे विभागीय समन्वयक म्हणूनही ते काम पाहतात. त्यांच्या यशाबद्दल सर्व स्तरातून व मित्रपरिवाराकडून त्यांचे विशेष अभिनंदन होत आहे.