राष्ट्रवादी युवक काँग्रेसचा तालुकाध्यक्ष भाजपच्या तंबूत

निजामपूर-जैताणे (धुळे) : माळमाथा परिसरातील रुनमळी (ता. साक्री) येथील माजी उपसरपंच तथा राष्ट्रवादी युवक काँग्रेसचे साक्री तालुकाध्यक्ष चंद्रकांत पवार गुरुवारी (ता. 15) दुपारी गावातीलच काही कार्यकर्त्यांसह भाजपच्या तंबूत दाखल झाले. त्यांनी खासदार डॉ. सुभाष भामरे यांच्या प्रमुख उपस्थितीत धुळे येथे भाजपात प्रवेश केला. विविध कार्यकारी सोसायटीचे माजी चेअरमन मधुकर गंगाराम पवार, विश्वास पुंजू पवार, ग्रामपंचायत सदस्य विशाल पवार, जगदीश पवार, प्रशांत पवार यांच्यासह अनेक कार्यकर्त्यांनी भाजपप्रवेश केला.

यावेळी भाजपचे प्रदेश सदस्य सुरेश रामराव पाटील, भाजप युवा मोर्चाचे साक्री तालुकाध्यक्ष डॉ. देवेंद्र देवरे, पंचायत समितीचे माजी सदस्य संजय सोनवणे आदी उपस्थित होते. चंद्रकांत पवार हे राष्ट्रवादीचे माजी जिल्हाध्यक्ष संदीप बेडसे यांचे खंदे समर्थक मानले जात होते. त्यांच्या भाजपप्रवेशाने साक्री तालुक्यासह माळमाथा परिसरात राष्ट्रवादी काँग्रेसला खिंडार पडले आहे.