VIDEO : शेतकरी बाप..कर्जाचा डोंगर..अन्‌ तिने संपविले जीवन 

जळगाव : अतिपावसाने शेतीचे झालेले नुकसान, सोसायटीचे कर्जाचा बोजा, घरातील हलाखीची परिस्थिती..घर कसे चालवायचे; या विवंचनेत शेतकऱ्यांनी आपली जीवनयात्रा संपविली; अशा घटना आतापर्यंत ऐकल्या आहेत. परंतु बापावर अगोदरच कर्जाचा डोंगर असल्याने आपल्या शिक्षणाची फी भरून आणखी बोजा कशाला वाढवायचा हि विवंचना आणि बाप जिवंत रहावा म्हणून सतरा वर्षीय मुलीनेच आपली जीवनयात्रा संपविल्याची घटना भादली येथे घडली. 

शेतीसाठी कर्ज घेऊनही हाती काही आले नाही

भादली येथील सतरा वर्षीय यामिनी प्रमोद पाटील (वय 17) असे मृत शेतकऱ्याच्या मुलीचे नाव आहे. जळगाव येथील नंदिनीबाई महिला विद्यालयात बारावी विज्ञान शाखेत ती शिक्षण घेत होती. बारावीचे निम्मे वर्ष सरले असताना याच सहा महिन्याच्या काळात कॉलेज आणि क्‍लाससाठी पैसा लागला. अतिपावसामुळे शेतीतून उत्पन्न मिळत नाही. म्हणून आई- वडील मोलमजूरी करतात. हे सर्व चित्र यामिनीने पाहिले होते. शेतीसाठी कर्ज घेवूनही हाती काही आले नाही; या कर्जाखाली दबलेल्या बापाने काही वेगळे पाऊल नको उचलावे या विचारातून यामिनीने जीवनयात्रा संपविली. 

तिचे दु:ख दर्शविणारे दृश्य

क्‍लाससाठी आणखी पैसे कोठून आणायचे 
दोन अडीच बिघे शेती करूनही आई- वडील दोघेही रोजाने दुसऱ्याच्या शेतात राबत होते. अशातच हंगामात अतिरिक्त पाऊस झाला त्यात होत्याचे नव्हते झाले. विकास सोसायटीचे कर्जाचा बोजा, त्यात कुटुंबाचा आर्थिक गाडा ओढणे जिकरीचे जात असल्याचे चित्र यामिनीला दिसत होते. तिच्या कुटुंबीयांनी नुकताच क्‍लासची काही फी अदा केली, मात्र पुढच्या काळात महाविद्यालयाच्या फी व्यतिरिक्त विविध विषयांचे क्‍लासेससाठी लागणारी फी देणे अशक्‍यप्राय असल्याने यामिनी विवंचनेत अडकली होती. 

हेही वाचा > काय मनात आले त्याच्या..की सप्तश्रृंगीच्या शीतकड्यावरून उडी घेतली
 

आई- वडील लग्न सोहळ्यात अन्‌... 
आज सकाळी आई-वडील दोघेही नात्यातील लग्न सोहळ्यासाठी भुसावळ येथे गेले होते. या दरम्यान दुपारी एकच्या सुमारास यामिनीने विष घेतले. दुपारी अडीचला आई- वडील घरी पोचले. आपण थायमेट घेतल्याचे यामिनीने सांगताच कुटुंबीयांनी तातडीने जिल्हा सामान्य रुग्णालयात हलवले. मात्र डॉक्‍टरांनी तिला मृत घोषित केले. रुग्णालय चौकीत एमएलसी नोंद होऊन नशिराबाद पोलिसांत या प्रकरणी आकस्मिक मृत्यूची नोंद करण्यात आली आहे. यामिनी पश्‍चात आई हेमलता, वडील प्रमोद आणि लहान भाऊ लोकेश असा परिवार आहे. 

वाचा सविस्तर > प्रसुतींच्या कळांनी बिथरली होती ती...त्यातच तिला दिसला 'तो'..अन् मग