सेंद्रिय पालकच्‍या शेतीतून विक्रमी उत्‍पादन 

कापडणे : येथील शेतकरी भाजीपाला उत्पादन घेण्यात माहीर आहेत. कमी क्षेत्रात ते अधिक उत्पादन घेतात. येथील ज्ञानेश्वर खलाणे या अल्पभूधारक शेतकऱ्याने पालकची शेती स्वतःचे उदरनिर्वाहाचे साधन म्‍हणून बनविले आहे. पत्नी आणि मुले यांच्या सहकार्याने पालकचे विक्रमी उत्पादन घेत आहेत. सध्या त्यांनी फुलविलेल्या सेंद्रिय पालकला बाजारात मोठी मागणी आहे. 

आवश्य वाचा- धुळ्यात धडकी भरवणारी गर्दी ! कोरोनाबाधितांची संख्या दिवसेंदिवस वाढती
 

धुळे बाजारात त्यांच्या भाजीपाल्याची वाट बघितली जाते. ज्ञानेश्वर खलाणे, उमाकांत खलाणे व गोविंद खलाणे हे तिन्ही बंधू व त्यांच्या पत्नी व मुले भाजीपाला उत्पादनात गुंतले आहेत. दिवसरात्र मेहनतीतून ते विक्रमी उत्पादन घेतात. धुळे व कापडणेच्या बाजारात स्वतः विक्री करतात. अधिकचा भाजीपाला शहादा व सुरतच्या बाजारात पाठवितात. भाजीपाला उत्पादनातून आर्थिक परिस्थिती सावरण्याचा प्रयत्न ते करीत आहेत. सध्या बाजारात दहा ते बारा रुपये किलोप्रमाणे पालकाच्‍या भाजीला मागणी आहे. एकरी पन्नास ते साठ हजार उत्‍पन्न शेतकऱ्याला एका सीझनमध्ये (म्‍हणजे दोन महिन्यात) मिळते. त्‍यामुळे शेतही लवकर खाली होऊन दुबार पीक घेता येते. 

पालकची शेती परवडणारी आहे. मात्र पूर्ण परिवार शेतीत राबतो, म्हणून दोन पैसे दिसतात. भाजीपाला उत्पादन घेणे हा सुरवातीला छंद जडला होता. आता व्यावसायिक उत्पादक झाल्याने उत्पादनात वाढ झाली आहे. शेतकऱ्या‍ने भाजीपाला पिकवून स्वतः बाजारात विक्री केल्यास तो अधिक परवडतो. 
- ज्ञानेश्वर खलाणे, भाजीपाला उत्पादक शेतकरी, कापडणे 
 

संपादन- भूषण श्रीखंडे