नेत्यांचा नुकसान पाहणीदौरा सुरु असतानांच आत्महत्येने खळबळ

मालेगाव : रोझे (ता.मालेगाव) येथील शेतकरी भास्कर रामा घुगे (65) यांनी शुक्रवारी सकाळी अकराच्या सुमारास शेतातच गळफास घेवून आत्महत्या केली. परतीच्या व अवकाळी पावसामुळे भुईसपाट झालेले पीक व कर्जाला कंटाळून त्यांनी आत्महत्या केली. 
तालुक्यातील कोठरे येथील केदा देवरे यांनी २ दिवसांपूर्वी विहिरीत उडी घेऊन आत्महत्या केली होती. आणि आज (ता.१) राष्ट्रवादी काँग्रेसचे ज्येष्ठ नेते शरद पवार,, कृषी राज्यमंत्री सदाभाऊ खोत, राज्यमंत्री दादा भुसे जिल्ह्यात नुकसानीचा आढावा घेत पाहणी करत असतांनाच या आत्महत्येने खळबळ उडाली आहे.

मालेगाव तालुक्यात सलग दुसरी शेतकरी आत्महत्या.

भास्कर घुगे यांची पाडळदे शिवारात एक हेक्टर तीस आर शेती आहे. शेतातील खरीपाचे कापूस, बाजरी व मका भुईसपाट झाला. अवकाळीने दाणादाण उडवली. उत्पादन येणार नाही. महाराष्ट्र बँकेचे कर्ज कसे भरावयाचे याची त्यांना चिंता होती. कर्जाची निश्चित रक्कम समजू शकली नाही. तसेच मुले व मुलीच्या लग्नासाठी नातलगांकडुन घेतले दोन ते अडीच लाख रुपये घेतलेले परत करायचे होते. सततचा दुष्काळा नंतर  या वर्षी चांगले पिक येईल ही आशा होती. पण निसर्गाने साथ दिली नाही , आणि अवकाळी पावसाने पुर्णपणे उत्पादन हिरावून घेतल्याने नैराश्यातून घुगे यांनी आत्महत्या केली. याबद्दल पंचक्रोशीसह तालुक्यात हळहळ व्यक्त करण्यात येत आहे. त्यांच्या पश्चात पत्नी, दोन मुले, मुलगी, सुन, नातवंडे असा परिवार आहे. मंडलअधिकारी एस. टी. विधाते, तलाठी पी. डी. खैरनार यांनी रोझे येथे भेट देवून पंचनामा केला. तहसिलदार चंद्रजित राजपुत यांनी या घटनेची माहिती घेतली.