प्रताप महाविद्यालय देशात ५८ वे, राज्यात १६ वे

अमळनेर : येथील खानदेश शिक्षण मंडळ संचालित प्रताप महाविद्यालयाला २०२०-२१ मधील देशातील ७४७ स्वायत्त महाविद्यालयांमध्ये ५८ वे तर राज्यातील स्वायत्त महाविद्यालयांमध्ये १६ वे मानांकन प्राप्त झाले आहे. याबाबत एज्युकेशन वर्ल्ड मॅगझीनने मानांकनांची यादी नुकतीच प्रसिद्ध केली आहे.
महाविद्यालयाची एकूणच गुणवत्ता व सुविधा पाहून युजीसी (दिल्ली) तर्फे महाविद्यालयांना स्वायत्त दर्जा दिला जातो. गेल्या वर्षीच प्रताप महाविद्यालयाला सर्व नियम व निकषांच्या आधारे स्वायत्त दर्जा मिळाला आहे. अवघ्या वर्षभरातच  महाविद्यालयाने मानांकनाच्या बाबतीत अनेक जुन्या जाणत्या महाविद्यालयांना मागे टाकून नेत्रदीपक झेप घेतली आहे , हे विशेष...!
बंगलुरू येथील नॅक मूल्यांकनातही महाविद्यालयास अत्यंत प्रतिष्टेचे ' ए प्लस ' मूल्यांकन मिळाले आहे. तसेच कवयित्री बहिणाबाई चौधरी उत्तर महाराष्ट्र विद्यापिठाच्या अकॅडमीक ऑडिट मध्ये सर्व कला,वाणिज्य व विज्ञान महाविद्यालयांमध्ये ८८ गुण मिळवून प्रताप महाविद्यालय अग्रस्थानी आहे.
महाविद्यालयात १९ विषयात पदवी पर्यंत तर १४ विषयात पदव्युत्तर पर्यंत शिक्षण उपलब्ध आहे.

एज्युकेशन वर्ल्डद्वारे प्रताप महाविद्यालयास मिळालेले गुणांकन असे :--
- शिक्षणाची गुणवत्ता २०० पैकी १५८
- शिक्षक कल्याण व विकास १०० पैकी ६२
- अभ्यासक्रम व शिकविणे १०० पैकी ६६
- प्लेसमेंट १०० पैकी ६७
- संसाधने व सोयी-सुविधा १०० पैकी ७३ 
- नेतृत्व  व संचालनाचा दर्जा १०० पैकी ६७
एकूण गुण - ७०० पैकी ४९३

महाविद्यालयाला स्वायत्त दर्जा मिळाल्याबरोबर पहिल्याच वर्षी मिळालेल्या मानांकनाचा मला व संस्थेच्या सर्व पदाधिकाऱ्यांना अत्यानंद आहे. मात्र जोपर्यंत आम्ही सर्वोत्कृष्ट मानांकन मिळविणार नाहीत तोपर्यंत आम्ही समाधानी होणार नाहीत.
योगेश मुंदडे, कार्याध्यक्ष, खा.शि.मंडळ, अमळनेर