"अमूल'च्या डिस्ट्रिब्युशनशिपचे आमिष दाखवून लाखोंना गंडा 

नाशिक : नामांकित कंपन्यांच्या उत्पादनाच्या डिस्ट्रिब्युशनचे आमिष दाखवून ऑनलाइन लाखो रुपयांना गंडा घातल्याचा आणखी एक प्रकार उघडकीस आला आहे. यावेळी ऑनलाईन चोरट्याने "अमूल'च्या डिस्ट्रिब्युशनशिपचे आमिष दाखवून सिडकोतील युवकाला तब्बल 3 लाख रुपयांना गंडविले. याप्रकरणी सायबर पोलीसात गुन्हा दाखल करण्यात आला आहे. 

गणेश विष्णू आरोटे (रा. राजलक्ष्मी रो हाऊस, महेश भवन, गणेश चौक, सिडको) यांच्या फिर्यादीनुसार, गेल्या महिन्यात 6 ते 10 ऑक्‍टोबर या दरम्यान अज्ञात संशयिताने मेलवरून गणेश आरोटे यांच्याशी संपर्क साधला होता. त्यावेळी संशयिताने अमूल द टेस्ट ऑफ इंडिया या नामांकित कंपनीच्या उत्पादनसाठीच्या डिस्ट्रिब्युशनशिपसंदर्भात विचारणा केली होती. अमूल ही नामांकित कंपनी असल्याने गणेश आरोटे यांनीही त्यासंदर्भात कोणतीही शहानिशा न करता संशयिताच्या आमिषाला बळी पडला. कंपनीची डिस्ट्रिब्युशनशिपसाठी संशयिताने विविध कारणांसाठी गणेश आरोटे यांना बॅंक खात्यावरून ऑनलाईन पैसे ट्रान्सफर करण्यास सांगितले. त्यानुसार वेळोवेळी श्री आरोटे याने 3 लाख 10 हजार 500 रुपये संशयिताने सांगितल्याप्रमाणे ऑनलाईन पैसे ट्रान्सफर केले. परंतु पैसे भरूनही अमूलची डिस्ट्रिब्युशनशिप मिळत नाही, असे लक्षात आल्यानंतर त्यांनी संपर्क साधला असता, प्रतिसाद मिळाल नाही. त्यावरून आपली फसवणूक झाल्याचे लक्षात येताच त्यांनी सायबर पोलीसात धाव घेत तक्रार दिली. त्यनुसार अज्ञात संशयिताविरोधात गुन्हा दाखल झाला आहे. काही दिवसांपूर्वी देवळाली कॅम्प परिसरातील व्यावसायिकालाही अशारितीने लाखो रुपयांचा गंडा ऑनलाईन चोरट्याने घातल्याचा प्रकार घडला आहे.