भाजपची राज्यात मध्यावधी निवडणुकांची तयारी? : पर्यटनमंत्री रावल यांचे बैठकीत निर्देश

धुळे : राज्यात भाजप व शिवसेनेत सत्तास्थापण्यापूर्वी मुख्यमंत्रिपद व "मलईदार' मंत्रिपदांवरून रस्सीखेच सुरूच आहे. हा तिढा सुटत नसताना राज्यात मध्यावधी निवडणुकांचे संकेत भाजपच्या गोटातून दिले जात आहेत. पर्यटन, अन्न व औषध प्रशासन, राजशिष्टाचारमंत्री जयकुमार रावल यांनी आज भाजपच्या पदाधिकाऱ्यांची सायंकाळनंतर आढावा बैठक घेतली. तीत मध्यावधी निवडणुकांसाठी भाजपला स्वबळावर तयारी करण्याचे निर्देश कार्यंकर्त्यांना दिले गेले. याला भाजपचे धुळे शहर- जिल्हाध्यक्ष अनुप अग्रवाल यांनीही दुजोरा दिला. निवडणुकीत मोठे यश मिळवून राज्यात पुन्हा देवेंद्र फडणवीस यांना मुख्यमंत्री करणार आहोत, असेही त्यांनी स्पष्ट केले. 

धुळे येथे पर्यटन, अन्न व औषध प्रशासन, राजशिष्टाचारमंत्री जयकुमार रावल यांच्या उपस्थितीत भाजपचे पदाधिकारी व कार्यकर्त्यांची बैठक घेण्यात आली. यावेळी त्यांनी मार्गदर्शन करताना कार्यकर्त्यांना मध्यावधी निवडणुकांसाठी तयार राहण्याचे आदेश दिले. धुळे जिल्ह्यात पाच मतदारसंघ आहेत. पैकी चार जागा भाजपने लढल्या होत्या. मात्र, केवळ दोन जागांवरच पक्षाला यश मिळाले. "साक्री'सह "धुळे ग्रामीण' या जागांवर पराभव झाला. आता पाचही जागा जिंकण्यासाठी कार्यकर्त्यांनी तयारी करावी, असे निर्देशही त्यांनी कार्यर्क्‍त्यांना दिले. "साक्री'सह "धुळे ग्रामीण'मध्ये नुकत्याच झालेल्या निवडणुकीनंतर जे मतदान झाले, त्यात आणखी पाच ते दहा हजार मते जमविण्यासाठी रणनीती ठरविली गेली. याबाबत मंत्री रावल यांनी पत्रकारांशी बोलतांना सांगितले, की धुळे जिल्ह्यात भाजपला चारही जागांवर यश मिळण्याची अपेक्षा होती; परंतु आम्हाला केवळ दोनच जागांवर यश मिळाले आहे. यावेळी भाजपतर्फे पाच जागा लढविण्यात येतील आणि पाचही जागांवर यश मिळविण्यात येईल. त्यादृष्टीने पक्षाच्या कार्यकर्ते तयारीला लागले आहेत. 

भाजपचे धुळे शहर- जिल्हाध्यक्ष अनुप अग्रवाल यांनी मंत्री रावल यांच्याकडून मध्यावधी निवडणुकांबाबत संकेत दिले गेल्याचे सांगितले. ते म्हणाले, की पर्यटनमंत्री रावल यांनी आम्हाला मध्यवधी विधानसभा निवडणुकांसाठी तयारीचे आदेश दिले आहेत. त्यानुसार आम्ही तयारीला लागलो आहोत. जिल्ह्यातील पाचही जागा आम्ही निवडून आणून देवेंद्र फडणसवीस यांना पुन्हा मुख्यमंत्री करणारच आहोत. 
 
आम्ही पुन्हा विधानसभा निवडणुकीच्या तयारीला लागलो आहोत. मंत्री जयकुमार रावल यांनी कार्यकर्त्यांची बैठक घेऊन तसे आदेश दिले आहेत. आगामी काळात केव्हाही विधानसभा निवडणूक लागली, तर त्यासाठी आम्ही तयार आहोत. जिल्ह्यातील पाचही जागा निवडून आणू. आमचे नेते देवेंद्र फडणवीस हेच मुख्यमंत्री होतील. 

- अनुप अग्रवाल, शहर- जिल्हाध्यक्ष, भाजप, धुळे 

धुळे जिल्ह्यात विधानसभेच्या पाच जागा आहेत. त्यापैकी चार जागा भाजपला होत्या. साक्री मतदारसंघात पाच हजार मते कमी पडल्यामुळे भाजपच्या बंडखोर निवडून आल्या. "धुळे ग्रामीण'मध्ये आठ हजार मते कमी पडल्यामुळे हीदेखील जागा गेली; अन्यथा सर्वच्या सर्व चारही जागा भाजपच्या आल्या असत्या; किंबहुना धुळे जिल्ह्यातील भाजपच्या कार्यकर्त्यांमध्ये अस्वस्थता होती. सर्व कार्यकर्त्यांची इच्छा होती, की सर्वच्या सर्व पाचही जागा लढल्या पाहिजेत. त्यासंदर्भात आमची कधीही तयारी आहे. 

- जयकुमार रावल, पर्यटन, अन्न व औषध प्रशासन, राजशिष्टाचारमंत्री