टोमॅटोला चढली लाली

कापडणे (धुळे) : लॉकडाऊनमुळे एप्रिल व मे मधील लग्नसराई बासनात गुंडाळली गेली. याचा परीणाम बाजारपेठेवर झाला. शेतीमालालाही मोठा फटका बसला. लग्नसराईत मागणी असलेला टोमॅटो प्रती कॅरेट केवळ शंभर ते दीडशे रूपया प्रमाणे विक्री होणे मुश्किल झाले होते. आता टोमॅटोने मोठी उसळी घेतली असू नटोमॅटो प्रती कॅरेट आठशेपर्यंत पोहचला आहे. 

धुळे तालुक्यात कापडणे, न्याहळोद, धमाणे, देवभाने, नंदाणे, बुरझड, लामकानी, बोरीस, मुकटी, अजंग, नेर व खेडे येथील शेतकरी भाजीपाला उत्पादनात अग्रेसर आहेत. अर्ध्या किंवा एक एकरमधूनही विक्रमी भाजीपाल्याचे उत्पादन काढण्याचे तंत्रज्ञान हस्तगत केले आहे.

टोमॅटोचे भाव आणखी वधारतील
शहादा व सुरतच्या बाजारात टोमॅटोचे भाव मोठ्या प्रमाणात वधारत चालले आहेत. गेल्या आठ दिवसात प्रती कॅरेट आठशेपर्यंत पोहचले आहेत. आगामी पंधरा दिवसांत हजारापर्यंत पोहचतील, असे व्यापाऱ्यांनी सांगितले.

भाव आहे तर माल नाही
सर्वच प्रकारच्या भाजीपाल्याचे दर प्रती किलो साठपेक्षा पुढे गेले आहेत. बाजारात अधिकचा भाजीपाला उपलब्ध नाही. सतत आणि अधिकच्या पावसाने भाजीपाल्याची उबवण कमी झाली. सडण्याचे प्रमाण पन्नास टक्के आहे. भाव आहे पण भाजीपाला तयार नसल्याने शेतकऱ्यांमधून नाराजी व्यक्त होत आहे.

लॉकडाऊनमुळे शेतीमालाचे नुकसान
शेतकऱ्यांनी एप्रिल मे मध्ये भाजीपाल्याचे विक्रमी उत्पादन काढले. लॉकडाऊनमुळे ते मातीमोल झाले. उत्पादन खर्चही निघाला नाही. उलट कर्जबाजारी होण्याची वेळ आली. भाजीपाल्यात शेळ्या व मेंढ्या यांना चराईसाठी सोडावे लागले होते.

लॉकडाउनमुळे शेतीमाल फुकटात विकावा लागला. किंबहुना उकिरड्यावरही फेकावा लागला. आता शेतीमालाला सोन्याचे दिवस आले आहेत. पण सततच्या पावसाने भाजीपाल्याचे मोठे नुकसान झाले. टोमॅटोची बाग पोटच्या पोरांसम जपली आहे. ती मला निश्चितच तारणार आहे.
- संजय माळी, टोमॅटो उत्पादक शेतकरी 

संपादन ः राजेश सोनवणे