भाजपने शेपूट घातले असे सेनेने समजू नये: गिरीश महाजन 

जळगाव - भारतीय जनता पक्ष आज देशातील क्रमांक एकचा पक्ष आहे. राज्यात आम्ही सत्तेतील मित्र पक्षाच्या मोठ्या भावाच्या भुमिकेत आहोत. त्यामुळे आम्ही शिवसेनेला समजून घेत आहोत. याचा अर्थ भाजपने शेपूट घातले शिवसेनेने समजू नये. आगामी निवडणूकीत तुम्ही सोबत असाल तर ठिक अन्यथा भाजप स्वबळावर निवडणूका लढवून सत्तेवर येईल, असा ईशारा भाजपचे नेते व राज्याचे जलसंपदामंत्री गिरीश महाजन यांनी शिवसेनेला दिला आहे. जळगाव येथे पक्षाच्या खानदेशस्तरीय मेळाव्यात ते बोलत होते. 

भारतीय जनता पक्षाचा 6 एप्रिल रोजी मुंबईत वर्धापनदिन साजरा करण्यात येणार आहे. त्या पार्श्‍वभूमीवर पक्षाची खानदेशस्तरीय पदाधिकाऱ्यांची बाबा हरदासराम सभागृहात आयोजित करण्यात आली होती. अध्यक्षस्थानी प्रदेश सरचिटणीस रामदास आंबटकर होते. तर खासदार रक्षा खडसे, ए.टी.पाटील, आमदार सुरेश भोळे, जिल्हाध्यक्ष उदय वाघ उपस्थित होते. प्रास्ताविक आमदार स्मिता वाघ यानी केले. 

यावेळी बोलतांना जलसंपदामंत्री गिरीश महाजन म्हणाले, भारतीय जनता पक्षाचे देशात 21 मुख्यमंत्री आहेत. स्वतंत्र्यानंतर एवढे मुख्यमंत्री असणारा भाजप हा एकमेव पक्ष आहे. देशात भाजप आज क्रमांक एकचा पक्ष आहे. उत्तर प्रदेशातील दोन पोटनिवडणूका जिंकल्या म्हणून विरोधकांनी हुरळून जावू नये. आम्ही मुख्य निवडणूका जिकंत आहोत हे त्यांनी लक्षात घ्यावे. 

राज्यातील भाजप सरकार यशस्वी ठरल्याचे सागूंन महाजन म्हणाले, काँग्रेसचा काळ आठवा आणि आजचा पहा आज जलयुक्त शिवाराने शेती समृध्द झाली आहे. वीज पूर्णवेळ दिली जात आहे. कापसाला चांगला भाव आहे, तूरडाळ, मका, धान, ज्वारी शासनाने खरेदी करून शेतकऱ्यांच्या मालाला भाव दिला आहे. त्यामुळे आमच्या सरकारच्या काळात शेतकरी सुखी आहे, तर रस्त्याच्या विकासही मोठ्या प्रमाणात झाला आहे. आज राज्यात सहा पदरी आणि चार पदरी महामार्ग आहेत. त्यामुळे आमच्या काळात मोठा विकास झाला असल्याचा दावाही त्यांनी केला