नियोजन आराखडा 436 कोटींवर 

जळगाव : जिल्ह्यातील वार्षिक योजनेसाठी 2020-21 मध्ये जिल्हा नियोजन मंडळामार्फत 436 कोटी 77 लाख 51 हजार रुपयांचा आराखडा प्रस्तावित करण्यात आला आहे. येत्या सोमवारी (ता.20) त्यासाठी पालकमंत्री गुलाबराव पाटील यांच्या अध्यक्षतेखाली नियोजन मंडळाची बैठक होत असून, या बैठकीत आराखड्यावर चर्चा होऊन मंजुरी देण्यात येईल. 

क्‍लिक करा - लाचखोरीचे बदलले स्वरूप, महसूल दोन कदम आगे...पहा कसे

राज्यात सत्तांतरानंतर पालकमंत्र्यांच्या नियुक्‍त्या रखडल्या होत्या. त्यामुळे जिल्हा वार्षिक योजनांच्या मंजुरीसाठी होणारी जिल्हा नियोजन मंडळाची बैठक देखील लांबणीवर पडली होती. मागील आठवड्यातच पालकमंत्र्यांच्या नियुक्‍त्या जाहीर करण्यात आल्या. जळगाव जिल्ह्याच्या पालकमंत्रिपदाची जबाबदारी गुलाबराव पाटील यांच्याकडे सोपविण्यात आल्यानंतर तातडीने जिल्हा नियोजन मंडळाची बैठक घेण्याचे आदेश गुलाबराव पाटील यांनी दिले. त्यानुसार जिल्हा नियोजन मंडळाची बैठक सोमवारी (ता.20) दुपारी एकला नियोजन भवनात आयोजित करण्यात आली आहे. बैठकीच्या अध्यक्षस्थानी पालकमंत्री गुलाबराव पाटील असतील. पाटील यांच्या अध्यक्षतेत ही पहिलीच बैठक होत आहे. 

नक्‍की पहा - पोलिस ठाण्यातच ते करायला गेले स्टिंग पुढे काय झाले पहा... 

निधी खर्चाचे आव्हान 
सन 2019-20 या आर्थिक वर्षात डिसेंबरअखेर जिल्हा वार्षिक योजना (सर्वसाधारण) 70.62. टक्के, आदिवासी घटक कार्यक्रम- 71.79 टक्के, आदिवासी घटक कार्यक्रम (ओटीएसपी) 44.13, अनुसूचित जाती उपयोजना 99.47 असा एकूण 72.79 टक्के खर्च झाला आहे. उर्वरित निधी दोन महिन्यात खर्च करण्याचे आव्हान प्रशासकीय यंत्रणांसमोर आहे. 

यंदा 436 कोटींचा आराखडा 
सन 2020-21 या आर्थिक वर्षाचा विकास आराखडा 436 कोटी 77 लाख 51 हजार रुपयांचा आहे. प्रशासकीय यंत्रणांनी 304 कोटीची अतिरिक्त 
निधीची मागणी केली आहे. 20 जानेवारीस होणाऱ्या बैठकीत या आराखड्याला मंजुरी दिली जाईल. 

राज्यस्तरीय बैठक 31 जानेवारीस 
जिल्हा वार्षिक योजनांचे प्रारूप आराखडे अंतिम करण्यासाठी नाशिक विभागाची आढावा बैठक उपमुख्यमंत्री अजित पवार यांच्या अध्यक्षतेखाली 31 जानेवारीस विभागीय आयुक्त कार्यालय, नाशिक येथे होणार आहे. यात जळगाव जिल्ह्याची बैठक दुपारी 12 ते 1 यावेळेत होणार आहे.