रेशनकार्ड "अपग्रेशन'साठी आर्थिक सक्ती 

जळगाव :शहरासह जिल्ह्यात स्वस्त धान्य दुकानांमध्ये रेशन कार्डातील व्यक्तीचे आधारकार्ड लिंकिंगसाठी दिल्यावरही पाच पाच महिने आधारलिंकिंग होत नाही. आधारकार्ड लिंकसाठी रेशनकार्डधारकांकडून पाचशे ते सहाशे रूपये मागितले जातात तरच आधारकार्ड लिंक केले जाते, अशा नागरिकांच्या तक्रारी आहेत. 

शहरासह जिल्ह्यात 1 हजार 832 हून अधिक रेशन दुकानदार आहेत. प्रत्येकाकडे ई-पॉज मशिन देण्यात आल्या आहेत. आधारकार्ड रेशनकार्डला लिंक केल्यानंतर कार्डामधील प्रत्येक सदस्यांचा अंगठा थम्ब म्हणून घेतला जातो. यामुळे रेशनकार्ड धारकांच्या कुटुंबातील कोणीही सदस्य रेशन घेण्यास गेल्यास त्याचे थम्ब घेऊन रेशनचे धान्य दिले जाते. मात्र, त्यासाठी रेशनकार्ड आधारकार्डशी लिंक करावे लागतात. 
अनेक रेशनकार्डधारकांनी तीन तीन वेळा कुटुंबातील सदस्यांची सर्व कागदपत्रे दिली आहे. मात्र, त्यांना रेशनकार्डावर धान्य मिळत नाही. कुटुंब प्रमुख विचारणा करण्यास गेल्यास आधारकार्ड लिंक करण्यासाठी संबंधित व्यक्तीला पाचशे रुपये द्यावे लागतात. ते दिले तरच आधार लिंक होईल; अन्यथा नाही. पाचशे रुपये अनेकांनी दिल्याची नोंदवही ते दाखवितात. जिल्हा पुरवठा अधिकाऱ्यांनी याकडे लक्ष देण्याची मागणी होत आहे. 

आर्वजून पहा : कुटूंबीय लग्नाच्या तयारीत...तेवढ्यात पडला छापा ! 
 

धान्याचा काळाबाजार 
अनेक रेशन दुकानदारांनी नागरिकांचे आधारकार्ड लिंक न करण्याचा धंदाच सुरू केला आहे. आधारकार्ड लिंक न झाल्यास त्या कुटुंबांचे धान्य काळ्या बाजारात विकले जाते. यामुळे थम्ब मशिन आल्यामुळे काळ्या बाजारात रेशनचे धान्य जाणार नाही, अशी समजूत चुकीची आहे. नक्की वाचा : अरे वा...142 शेतकऱ्यांची कर्जमाफीची रक्कम प्राप्त