मेंटेनन्सचा खर्च जिल्हा प्रशासन, शासनाने करावा 

मेंटेनन्सचा खर्च जिल्हा प्रशासन, शासनाने करावा 

जळगाव ः महाबळ कॉलनी रस्त्यावर बांधलेले अत्याधुनिक नाट्यगृहाचे भाडे पाहता, हौशी, होतकरू कलावंतांसाठी बांधले गेलेले नाही असेच म्हणावे लागेल. नाट्यगृह हे संस्कृती, समृद्धी व माणुसकी जपण्यासाठी असते. सामाजिक स्वास्थ्य जपण्यासाठी शासनाने, जिल्हा प्रशासनाने नाट्यगृहाचा मेंटेनन्स खर्च सहन करावा अशी मागणी हौशी कलावंताची आहे. 

 
शासनाने खर्च पेलावा 
शंभू पाटील (रंगकर्मी) ः नाट्यगृह ही जागा समाजाच्या स्वास्थ्यासाठी बांधली जाते. नाट्यगृहातून व्यावहारिक उत्पन्न मिळावे असा दृष्टिकोन शासनाने, जिल्हा प्रशासनाने ठेवायला नको. नाट्यगृह संस्कृती, समृद्धी, माणुसकी टिकविण्याची जागा असते. त्याठिकाणी रसिकांच्या, प्रेक्षकांच्या भावनांचा विचार करायचा असतो. कमर्शिअल दृष्टिकोन पाहायचा नसतो. नाट्यगृह तयार झाल्यानंतर त्यातून उत्पन्न मिळेल असे शासन, जिल्हा प्रशासनाला का वाटते. जिल्हा रुग्णालय, जिल्हा क्रीडासंकुल याद्वारे उत्पन्न मिळेल अशी आशा शासन, जिल्हा प्रशासन करू शकेल काय? समाजाच्या चांगल्या स्वास्थ्यासाठी नाटकांची गरज असते. जर वीस ते साठ हजार केवळ भाडे आकारले जाईल तर तेथे कोण नाटक आयोजित करेल. प्रेक्षक कितीपर्यंत तिकिटाचे भाडे देवू शकतात याचा तरी विचार करावा. प्रशासनाने नाट्यगृहाच्या मेंटनन्ससाठी वेगळी तरतूद करावी. किमान नाटकांसाठी तरी हा खर्च जिल्हा प्रशासन किंवा शासनाने करावा. यापुढे नाट्यगृह बांधताना एकूण किमतीच्या 15 टक्के रक्कम मेटेंनन्ससाठी राखीव ठेवावी. 
 
दर कमी असावेतच, हर्शल पाटील 
हर्शल पाटील (नाट्य कलावंत) ः जेव्हा नाटकाचे काम सुरू होते, तेव्हा आम्हा हौशी कलावंतांना अत्यानंद झाला होता. मोठ्या प्रशस्त नाट्यगृहात नाटक सादर करायला मिळेल. मात्र आता भाडे पाहता ते शक्‍य नाही. आतापर्यंत एकही नाटक या नाट्यगृहात हौशी कलावंतांनी सादर केलेले नाही. शासनाने नाट्यगृह पैसा कमाविण्यासाठी तयार केले नाही. सेवेसाठी तयार केले आहे. यामुळे हौशी कलावंतांच्या नाटकांना अत्यल्प दर असावा. हौशी कलावंत आपली कामे सांभाळून रंगभूमीची सेवा करीत असतो. कमर्शिअल नाटकांना भाडे आकारण्यास हरकत नाही. मात्र हौशी कलावंतांच्या नाटकांना अत्यल्प दर पाहिजेच. 
 
हौशी कलावंतांसाठी नाट्यगृह नाही 
चिंतामण पाटील (अध्यक्ष, खानदेश नाट्य प्रतिष्ठान) ः जळगावात बांधलेले नाट्यगृह हे हौशी कलावंतांसाठी नाही. राज्यात सर्वाधिक भाडे या नाट्यगृहाचे आहे. हौशी कलावंतांच्या नाटकांना प्रेक्षकांची संख्या कमी असते. त्यांना भाड्याचा दर परवडणारा नाही. नाटक सादर करताना तांत्रिक अडचणी येथे अनेक आहेत. येथे बांधलेले तालीम गृहाची वेळ मर्यादित आहे. हौशी कलावंतांना जर तालीमीस येण्यास उशीर झाला. पुढे तेवढा वेळ अधिक झाला तर भाडे अधिकच द्यावे लागेल.
 
किमान दर असावेत 
सोनाली पाटील (नाट्यकर्मी) ः जळगावच्या नाट्यगृहाचे भाडे अधिकच आहे. ते किमान नाटक सादर करणाऱ्या संस्था, संघटनांना अल्प दराने दिली गेले पाहिजे. नाट्यगृहात नाटक करण्यास नाट्य संस्था, कलावंत पुढे येतील. अन्यथा नाट्यगृहाचा मुख्य उद्देश सफल कसा होईल ? अनेक कलावंत, नाट्यसंस्था नवीन नाट्यगृहात नाटक करण्यास, उत्सुक आहेत. मात्र भाडे पाहूनच थांबतात. 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com