दहा कोटी रुपये खर्चूनही आदिवासींच्या जिवाशी खेळ सुरूच ! 

तळोदा : सातपुड्यातील अतिदुर्गम भागातील तीनसमाळ रस्त्यावर ठेकेदाराच्या सुमार कामामुळे अपघातांची मालिका सुरूच असून, प्रधानमंत्री ग्राम सडक योजना कामाचे दहा कोटी रुपये खर्च करूनही आदिवासींच्या जिवाशी खेळ सुरू असल्याचा आरोप लोकसंघर्ष मोर्चाच्या प्रतिभा शिंदे यांनी केला आहे. त्यामुळे तीनसमाळ गावातील नागरिकांच्या यातना कधी संपणार व प्रधानमंत्री ग्राम सडक योजनेच्या कामातील भ्रष्टाचार करणाऱ्या अधिकारी व ठेकेदारांवर चौकशी होऊन कारवाई व्हावी व तीनसमाळ गावाचा विकासाचे आव्हान प्रशासनाने स्वीकारावे, अशी मागणी लोकसंघर्ष मोर्चाने केली आहे. 

आवश्य वाचा- धुळे सायकलिस्टच्या १२ सायकलस्वारांनी सहाशे किमी अंतर कापले ४० तासांत 
 

याबाबत मोर्चाने दिलेल्या प्रसिद्धीपत्रकात म्हटले आहे, की प्रधानमंत्री ग्राम सडक योजनेच्या दहा कोटी रुपये खर्च करून तयार झालेला तीनसमाळ गावाचा रस्ता पूर्णतः खराब असून, ठेकेदाराने कामच केलेले नाही. ठेकेदाराने व संबंधित विभागाने केवळ आपली तिजोरी भरली असून, आदिवासींच्या जिवाशी खेळ सुरूच ठेवला आहे. मागील काळात तब्बल नऊ वेळा या रस्त्यावर वाहन अपघात होण्याचा घटना घडल्या आहेत. तरीही रस्त्याची दुरुस्ती होत नसल्याची परिस्थिती आहे.

आवर्जून वाचा- भारतातील रहस्यमय असा..हाडांचा सांगाड्यांचा रुपकुंड तलाव; संशोधनातून या गोष्टी आल्या समोर
 

यासंदर्भात लोकसंघर्ष मोर्चाकडून पंतप्रधान कार्यालयात ऑनलाइन तक्रार प्रतिभा शिंदे, गणेश पराडके व तानाजी पावरा यांनी दाखल केली आहे. तर दुसरीकडे अतिदुर्गम गाव सरदार सरोवर धरणाच्या पाण्यामुळे चारही बाजूने वेढले गेले असून, टापू बनले आहे. या गावातील लोकांना वन्य प्राण्यांपासून धोका तर असतोच, मात्र गरोदर महिला आणि आजारी नागरिकांना अनेक किलोमीटर बांबूलन्सने धडगावला आणावे लागते. त्यामुळे या गावाच्या विकासाचे आव्हान प्रशासनाने उचलावे, अशी मागणी लोकसंघर्ष मोर्चाने केली आहे. 

संपादन- भूषण श्रीखंडे