आडगाव शिवार बनलाय मृत्युचा सापळा; 3 महिन्यात आठ अपघाती मृत्यू

नाशिक : अज्ञात वाहनाच्या धडकेत मृत्यू हा आडगाव शिवारातील महत्वाचा विषय बनला आहे. आडगावला शेरे पंजाब धाब्यासमोर तीन महिन्यात आठ अपघाती मृत्यू झाले आहेत. एकाच भागात वारंवार होणाऱ्या मृत्युमुळे हा परिसर मृत्यूचा सापळा बनला आहे. आडगाव पोलिस ठाण्याच्या हद्दीत दोन वेगेवगेळ्या अपघातात (Accident) अज्ञात वाहनाच्या धडकेत दोन युवकांचे मृत्यू झाले. दोन्ही घटनातील वाहन चालक अपघातानंतर पळून गेले.

नाशिक औरंगाबाद मार्गावर वाहनाने धडक दिल्याने गंभीर जखमी असलेल्या युवकाचा मृत्यू झाला. महेश निंबारा (वय २३, नारवड, झिमनपाडा, जि. वलसाड गुजरात) असे अपघातात मृत्युमुखी पडलेल्या युवकाचे नाव आहे. मृत महेश हा युवक काही दिवसांपासून माडसांगवी शिवारात टोल नाक्याजवळ रोहन पेखळे यांच्या मळ्यात राहायचा. रात्री नऊला रस्त्याने भरधाव चाललेल्या वाहनाने धडक दिल्याने तो गंभीर जखमी झाला होता. त्यात त्याचे निधन झाले. दुसरा अपघात मुंबई आग्रा महामार्गावर शेरे पंजाब हॉटेल परिसरात घडला. अज्ञात वाहनाच्या धडकेत एका युवकाचा यात मृत्यू झाला. गुरुवारी (ता.३१) रात्री सव्वा अकराच्या सुमारास हा अपघात झाला. याप्रकरणी वेगवेगळ्या तक्रारीवरुन आडगाव (Adgaon) पोलिस ठाण्यात अपघाताचा गुन्हा दाखल झाला आहे.