आश्रमशाळांच्या  शिक्षकांना चार महिने उशिरा वेतन; आर्थिक घडी विस्कटल्याने शिक्षकांवर वाढला ताण 

नाशिक : आदिवासी विभागातील विविध प्रकल्पांतील अनुदानित आश्रमशाळांच्या शिक्षक-शिक्षकेतर कर्मचाऱ्यांच्या वेतनासाठीच्या निधीची चणचण भासू लागल्याने वेतनासाठी चार महिने प्रतीक्षा करावी लागत आहे. कोरोना विषाणू संसर्ग फैलावाच्या काळात आर्थिक घडी विस्कटल्याने शिक्षक-शिक्षकेतरांवरील मानसिक ताण वाढत चालला आहे. 

आश्रमशाळांच्या  शिक्षकांना चार महिने उशिरा वेतन

दसरा सणापासून वेतनातील उद्‍भवलेली अनियमितता दिवाळीमध्ये संपुष्टात येईल, असे वेतनासाठी पाठपुरावा करणाऱ्या शिक्षक-शिक्षकेतर कर्मचाऱ्यांना यंत्रणेकडून सांगण्यात येत होते. प्रत्यक्षात मात्र डिसेंबर संपला, तरीही ऑक्टोबर-नोव्हेंबरची वेतन देयके विविध प्रकल्पांत अडकून पडली आहेत. कोरोनाकाळात अनुदानित आश्रमशाळा शिक्षक-शिक्षकेतर कर्मचाऱ्यांनी ऑनलाइन विद्यार्थ्यांना शिक्षण देणे, खावटी अनुदानाचे सर्वेक्षण करणे आदी विविध प्रकारची प्रकल्पस्तरीय कार्यालयांनी सुचविलेली सर्व प्रकारची कामे करण्यात आली. तरीही अशा शिक्षक-शिक्षकेतरांना वेळेवर वेतन देण्याची तसदी घेतली जात नसल्याने संताप व्यक्त होत आहे. 

हेही वाचा - जेव्हा पोटच्या गोळ्यांसह मातेचे मृतदेह दिसले पाण्यावर तरंगताना; शेतकऱ्यांना भरला थरकाप

अधिकच्या व्याजदराचा भुर्दंड सहन करण्याची वेळ
वेतन वेळेत होत नसल्याने आर्थिक नियोजनाची घडी विस्कटली आहे. शिवाय बँकांकडून गृह व अन्य प्रकारच्या काढलेल्या कर्जाच्या हप्त्यांची नियमित परतफेड होत नाही. विम्याचे वेळेवर हप्ते देता येत नाहीत. परिणामी, अधिकच्या व्याजदराचा भुर्दंड सहन करण्याची वेळ शिक्षक-शिक्षकेतरांवर आली आहे. काही शिक्षक-शिक्षकेतरांनी प्रकल्प कार्यालयात विचारणा केल्यावर वेतन देयके मंजुरीसाठी पाठविली जातात, मात्र सी.एम.पी. होत नाही, अशी माहिती दिली जात आहे.  

हेही वाचा - वडिलांसोबतची लेकीची 'ती' ड्राईव्ह शेवटचीच; पित्याचा ह्रदय पिळवटून टाकणारा आक्रोश