कोव्हिशील्डचा दुसऱ्या डोसचा कालावधी वाढविला; गर्दी न करण्याचे आवाहन

नाशिक : केंद्र सरकारतर्फे कोव्हिशील्डचा (Covishield) दुसरा डोस घेण्याची मुदत वाढविण्यात आली आहे. शनिवार (ता.१५) पासून शहरातील सर्व आरोग्य केंद्रांवर आता कोव्हिशील्डचा पहिला डोस घेतल्यानंतर दुसरा डोस घेण्याचा कालावधी ६ ते ८ आठवड्यांवरून १२ ते १६ आठवडे असा करण्यात आला आहे. (Covishield dose only after 84 days)

८४ दिवसानंतरच कोव्हिशील्डचा डोस

१५ मे या तारखेच्या आधी कोव्हिशील्ड लसीचा पहिला डोस घेतलेल्या नागरिकांना आता ८४ दिवस झाल्यानंतरच दुसरा डोस मिळणार आहे. १५ मेपासून ज्या नागरिकांचा पहिला डोस घेऊन ८४ दिवस पूर्ण झाले असतील त्या नागरिकांनाच कोव्हिशील्डचा दुसरा डोस मिळणार आहे. तसेच कोव्हॅक्सिन या लसीचे पहिल्या व दुसऱ्या डोसचे अंतर पूर्वीप्रमाणे २८ ते ४२ दिवसच राहणार आहे. ज्या नागरिकांचे कोव्हिशील्ड डोस घेऊन ८४ दिवस पूर्ण झाले नसतील, त्या नागरिकांनी केंद्रांवर गर्दी न करण्याचे आवाहन पालिका प्रशासनाने केले आहे.