द्राक्ष व्यापाऱ्याने घातला शेतकऱ्याला 4 लाखाचा गंडा

पिंपळगाव बसवंत (जि. नाशिक) : अस्मानी संकटांनी शेतकरी बेजार असताना व्यापाऱ्यांच्या पलायनाने सुलतानी संकट ओढावले आहे. लोणवाडी (ता. निफाड) (Niphad) येथील शेतकऱ्याला ४ लाख १० हजार रूपयांचा गंडा घालून परप्रांतीय व्यापाऱ्याने धूम ठोकली आहे. पिंपळगांव (Pimplegaon) पोलिस ठाण्यात व्यापाऱ्याविरोधात तक्रार दाखल करण्यात आली आहे.

मोहम्मद रूस्तम ऊर्फ एम. डी. नवाब या व्यापाऱ्याने लोणवाडी (ता.निफाड) येथील शेतकरी रामदास निवृत्ती जाधव यांच्या द्राक्षांचा सौदा (Grape deal) केला. त्यातील चार लाख १० हजार रूपयांची रक्कम न देताच मोहम्मद रूस्तम पसार झाला आहे. शेतकरी रामदास जाधव यांनी व्यापाऱ्याविरोधी पिंपळगाव पोलिस ठाण्यात तक्रार दाखल केली आहे. सहाय्यक पोलिस निरीक्षक कुणाल सपकाळे तपास करीत आहे.