मित्र वणव्यामध्ये गारव्यासारखा... दोस्ताला चंद्रावर केली जमीन 'गिफ्ट'

मित्र वणव्यामध्ये गारव्यासारखा असं म्हटलं जातं. दोस्तीचं नातं कायम सगळ्यांना हवं हवंसं वाटत असतं. मित्र एकमेकांच्या सुख दु:खात कायम वाटेकरी असतात. गरज असेल किंवा मदतीचा हात पुढे करायचा असेल, शेवटी मित्रच आधार असतात. त्यासाठी रक्ताच्या नात्यांची आवश्यकता नसते. नाशिकमध्ये एकाने दोस्ताला थेट चंद्रावर जमीन गिफ्ट केली आहे. (Land Gifted on moon)

इगतपुरीच्या गोंदेमधील या मित्रांचा किस्सा सध्या चर्चेचा विषय ठरला आहे. एमबीबीसचा विद्यार्थी असणाऱ्या रुपेश नाठे याला त्याच्या डॉक्टर मित्राने चंद्रावर 1 एकराचा प्लॉट दिलाय. रुपेशचा वाढदिवस असल्याने त्याला डॉ. हृषीकेश मुधळे आणि कुटुंबीयांनी हे गिफ्ट दिलंय. आंतरराष्ट्रीय लुनार लॅन्ड्स ऑथोरिटी (ILLA) या संस्थेकडे यासंबंधी अधिकृत प्रक्रिया पूर्ण करण्यात आली आहे. जागेची नोंदणी झाल्यानंतर त्याचा अधिकृत नकाशाही दोघांना देण्यात आला आहे.

याआधी सुशांतसिंह राजपूतलाही अशाच प्रकारे चंद्रावर जमीन गिफ्ट करण्यात आली होती. सुशांतसिंहच्या आत्महत्येनंतर त्याच्या उरलेल्या वस्तूंमध्ये ही बाब समोर आली होती.