Nashik News : घोटीत स्मशानभूमीजवळ आढळला अर्धवट जळालेला मृतदेह

घोटी : घोटी शहरात आज सकाळी साडेसातच्या सुमारास एक अनोळखी व्यक्तीचा अर्धवट जळालेल्या स्थितीत युवकाचा मृतदेह आढळून आला. हा मृतदेह घोटी स्मशानभूमी परिसरात आढळल्याने हा घातपाताचा प्रकार की आत्महत्या की आणखी काही याबाबत शंका उपस्थित केली जात आहे.

मृतदेहाची ओळख पटविणे सुरू आहे. घोटी पोलिसांनी घटनास्थळाचा पंचनामा करून आकस्मिक मृत्यूची नोंद केली आहे. घटनेबाबत कोणालाही काही माहिती असल्यास घोटी पोलिसांशी संपर्क साधण्याचे आवाहन करण्यात आले आहे. विभागीय पोलिस अधिकारी डॉ. अर्जुन भोसले, स्थानिक गुन्हे शाखेचे पथक व घोटी पोलिस घटनेचा तपास करीत आहेत. (Partially burnt dead body found near Ghoti graveyard Nashik News)

हेही वाचा : ..ही काळजी घ्या नाहीतर खिसा होईल साफ!

घोटी शहरात दारणा नदीलगत असलेल्या स्मशानभूमी शिवारात एका युवकाचा मृतदेह अर्धवट जळालेल्या अवस्थेत पडून असल्याची माहिती नागरिकांनी पोलिसांना कळविली. पोलिस पथकाने पाहणी केली असता अंदाजे २५ ते ३० वयोगटातील युवकाचा तो मृतदेह होता.

युवकाच्या डाव्या हातावर R.M तर उजव्या हातावर जिविता N.R असे गोंदलेले असल्याचे निदर्शनास आले. स्थानिक गुन्हे शाखेचे पथक व पोलिस ठाण्याचे सहायक निरीक्षक दिलीप खेडकर यांच्यासह उपनिरीक्षक संजय कवडे आदींसह कर्मचारी तपास करीत आहेत.