गाेव्याच्या दंगलीतील संशयित नाशिकमध्ये जेरबंद | Nashik

नाशिक : गोवा (Goa) राज्यातील कलंगुट (Calangute) पाेलिस ठाण्याच्या हद्दीत दंगल घडवून प्राणघातक हल्ला केल्याच्या गुन्ह्यातील संशयित आरोपीला युनिट-1 च्या पथकाने सारडा सर्कलवर पाठलाग करुन पकडले. त्याचा ताबा नाॅर्थ गाेवा (North Goa) पाेलिसांच्या गुन्हेशाखेकडे देण्यात आला आहे.

पाेलिसांना पाहताच केला पळून जाण्याचा प्रयत्न

सुनिल नारायण भूमकर (३६ रा. कलंगुट, राज्य गोवा) असे संशयिताचे नाव आहे. गाेवा येथील कलंगुट पोलिस ठाण्यात (गुन्हा रजिस्टर नंबर १९३/२१) दाखल असलेल्या गुन्ह्यात संशयित भूमकर पसार हाेता. त्याचा नाॅर्थ गाेवा पाेलिसांची गुन्हे शाखा तसेच नाशिक पोलिस शाेध घेत हाेते. भूमकरचा शोध घेण्यासाठी युनिट-1ने मदत करतांना पोलिस निरीक्षक आनंद गावकर पथकासह शनिवारी सकाळी नाशिकमध्ये आले. भूमकर हा द्वारका येथे येणार असल्याचे विजय ढमाळ यांना सांगितली.

त्यानुसार युनिट-1चे विजय ढमाळ, सहायक निरीक्षक खैरनार, उपनिरीक्षक उगले, एएसआय बागुल तसेच गाेवा पाेलिसांचे पथक द्वारका परिसरातील लॉज व हाॅटेल तपासत असतांना सारडा सर्कलवरील हॉटेल एस. एम. इंम्पिरियल येथे भूमकर दिसून आला. पाेलिसांना पाहताच त्याने पळून जाण्याचा प्रयत्न केला. मात्र, पथकाने त्याचा पाठलाग केला. तसेच थाेड्या झटापटीनंतर त्याला ताब्यात घेतले. त्याची नाेंद व वैद्यकीय तपासणी करून ताबा गाेवा पाेलिसांकडे दिला.