मालेगाव : शहरातील जुन्या महामार्गावर दोन ट्रकला आग

मालेगाव : शहरातील जुन्या महामार्गावर दोन ट्रकला मुख्य वीज वाहिनीचे शॉर्टसर्किट होवून आगीचे लोळ पडल्याने आग लागली. या आगीत एक ट्रक व त्यातील शेती उपयोगी औषधे जळून खाक झाली. दुसऱ्या ट्रकचे मोठ्या प्रमाणावर नुकसान झाल्याने लाखोचे नुकसान झाल्याचा अंदाज आहे. मंगळवारी दुपारी सव्वाचारच्या सुमारास फरान हॉस्पीटलनजीक हा प्रकार घडला. महापालिका अग्निशमक दलाच्या दोन बंबांनी चार खेपा करुन आग आटोक्यात आणली. वीज वाहिन्याच्या शॉर्टसर्किटने महामार्गानजीक उभ्या असलेल्या दोन ट्रकला (एमएच १८ एन ४४७४) (एमएच ०४ ईबी ३०९९) आग लागली. सुरुवातीला एका ट्रकला आग लागली. दुसरा ट्रक तातडीने अन्यत्र न हलविल्याने तोही आगीच्या ज्वाळांनी वेढला गेला. मनपा अग्निशामक दलाचे जवान तातडीने दाखल झाले. अग्निशमन अधिक्षक संजय पवार यांच्या मार्गदर्शनाखाली जवानांनी तातडीने आग विझवली. नुकसानीचा पंचनामा करणे सुरु आहे. यामुळे नुकसानीचा निश्‍चित अंदाज समजू शकला नाही. मनपा अग्निशामक दलात नोंद करण्यात आली आहे.