फागणे-तरसोद चौपदरीकरणाचे काम लागणार मार्गी 

जळगाव : गेल्या दोन वर्षांपासून रखडलेल्या राष्ट्रीय महामार्गाच्या फागणे- तरसोद टप्प्यातील चौपदरीकरणाचे काम मार्गी लागण्याची चिन्हे आहेत. मक्तेदार एजन्सीने या कामाला गती देण्याच्या दृष्टीने आठवडाभरात यंत्रणा उभारण्याचे निश्‍चित केले असून, या टप्प्यात तीन ठिकाणी बांधकामाचे "प्लॅंट' उभारण्यात येणार आहेत. 
अनेक वर्षांपासून प्रलंबित राष्ट्रीय महामार्ग क्रमांक सहाच्या चौपदरीकरणाच्या कामाला दोन-तीन वर्षांपूर्वी सुरवात झाली. धुळे व जळगाव जिल्ह्यातील एका टप्प्यातील काम फागणे- तरसोद व तरसोद- चिखली अशा दोन टप्प्यात विभागून दोन स्वतंत्र निविदा काढण्यात आल्या. याद्वारे दोन स्वतंत्र मक्तेदार एजन्सींना हे काम देण्यात आले. 

फागणे-तरसोद काम रखडले 
या दोन्ही कामांना खरेतर एकाचवेळी मंजुरी मिळाली, कार्यादेश देण्यात आले. मात्र, एकीकडे तरसोद- चिखली टप्प्याचे काम वेगात होत असताना दोन वर्षांपासून फागणे ते तरसोद या टप्प्यातील काम रखडले होते. मक्तेदार एजन्सी एमबीएल ऍग्रोला दरम्यानच्या काळात निधीची अडचण आल्याने काम ठप्प झाले. 

काम मार्गी लागणार 
माध्यम व लोकप्रतिनिधींनी सातत्याने पाठपुरावा केल्यानंतर आता हे काम आता मार्गी लागण्याची चिन्हे आहेत. गेल्या दोन- तीन महिन्यांपासून हे काम अगदीच संथगतीने सुरू होते. एक-दोन ठिकाणी दहा- पंधरा कामगार या साइटवर दिसत होते. आता मात्र या 87 किलोमीटरच्या टप्प्यातील कामाला गती देण्यात येणार आहे. त्यासाठी मुकटी, पारोळा- एरंडोलदरम्यान व मुसळी- पाळधी टप्प्यात असे तीन बांधकामाचे प्लॅंट कार्यान्वित करण्यात येतील. युद्धपातळीवर काम सुरू झाल्यानंतर ते दोन वर्षांत पूर्ण करण्याचे लक्ष्य ठेवण्यात आले आहे. 

दुरुस्तीही तातडीने होणार 
चौपदरीकरणाचे काम ठप्प असताना सध्या अस्तित्वात असलेल्या महामार्गाची प्रचंड दुरवस्था झाली आहे. खड्ड्यांमुळे रस्त्याची चाळण झाली असून, वाहनधारक कमालीचे त्रस्त आहेत. त्यामुळे या महामार्गाचीही दुरुस्ती तातडीने सुरू करण्यात येणार आहे. या महामार्गावर सर्वाधिक खराब टप्पा असलेल्या पाळधी ते एकलग्न व पुढे मुसळी- एरंडोलपर्यंतच्या मार्गाची दुरुस्ती त्वरित तीन पथकांच्या माध्यमातून सुरू करण्यात येईल, असे सूत्रांनी सांगितले.