शहरात पार्किंगचा बोजवारा 

नाशिक - काही महिन्यांपासून शहरात पार्किंगचा मोठा प्रश्‍न निर्माण झाला असून, त्यातून मध्यवर्ती भागात किरकोळ वादाला तोंड द्यावे लागत आहे. वाहतूक पोलिसांकडून दुचाकी वाहने उचलली जात असल्याने कारवाईच्या भीतीने दुकानांसमोर व जागा मिळेल त्या ठिकाणी वाहने लावली जात असल्याने त्यातून वाद निर्माण होत आहेत. महापालिकेने पार्किंगची व्यवस्था करण्याबरोबरच पोलिसांकडूनदेखील रस्त्यालगतच्या वाहनांसाठी तारखा ठरवून देणे गरजेचे असताना त्याकडे दुर्लक्ष होत आहे. 

उन्हाळ्याच्या पार्श्‍वभूमीवर अनेक महानगरांमध्ये पिण्याच्या पाण्यावरून संघर्ष निर्माण होत असतानाच नाशिकमध्ये मात्र पार्किंगच्या प्रश्‍नाने वाहनधारकांना हैराण केले आहे. शहरातील सीबीएस, शालिमार, रविवार कारंजा, महात्मा गांधी रस्ता, शरणपूर रोड, गंगापूर रोड, अशोक स्तंभ, मेन रोड आदी भागात दुचाकी लावण्यासाठी जागा नाही. रस्त्यावर वाहने लावल्यास वाहतूक पोलिसांनी नियुक्त केलेल्या ठेकेदारांकडून वाहने उचलली जातात. शरणपूर रस्त्यावरील जुन्या पोलिस आयुक्तालयात वाहने जमा केली जातात. दुचाकी वाहने परत मिळविण्यासाठी तीनशे रुपये दंड अदा करावा लागतो. त्यामुळे कारवाईच्या भीतीने दुकानांसमोर पार्किंग केली जाते. परंतु वाहनांमुळे दुकाने झाकली जात असल्याने दुकानांसमोर थेट पंक्‍चर व नुकसानीच्या धमकीचे बोर्ड लावले जात आहेत. बळजबरीने वाहने लावण्याचा प्रयत्न झाल्यास हातघाईवर प्रकरणे येण्याचे प्रकार वाढले आहेत. 

मध्यवर्ती भागात समस्या 
शहरात पार्किंगची व्यवस्था करण्याची मुख्यत्वे जबाबदारी महापालिकेची असतानादेखील पार्किंग जागांचा विकास केला जात नाही. ऑन स्ट्रिट व ऑफ स्ट्रिट पार्किंगसाठी गंगापूर, शरणपूर रस्त्यावर रेखांकन केले असले तरी मध्यवर्ती भागात पार्किंगची समस्या असल्याने त्याकडे दुर्लक्ष होत आहे. पोलिसांनी सम व विषम तारखांना रस्त्यालगत वाहने लावण्याची सोय करणे गरजेचे असताना महात्मा गांधी रोड वगळता वर्दळीच्या ठिकाणी तशी सोय नाही. 

पार्किंगमधून कमाई 
शहरात दिवसा अडीच लाखांहून अधिक वाहने रस्त्यावर धावतात. त्यामुळे पार्किंगचा प्रश्‍न निर्माण झाला आहे. मिळकतमालकांच्या वाहनांना जागा मिळत नसल्याने त्यातून आता पार्किंगचा धंदा सुरू झाला आहे. नेहरू उद्यान, सीबीएस येथील खासगी जागांमध्ये ताशी दहा रुपये वाहने लावण्याचा दर आकारला जात आहे.