Dhule : साडेसातशे हरकतदारांची सुनावणीला ‘दांडी’

धुळे : हद्दवाढ क्षेत्रातील मालमत्तांच्या सुधारित कर आकारणीच्या (Revised taxation of property in boundary area) हरकतींवर २७ जूनपासून प्रारंभ झाला. १ जुलैपर्यंत अर्थात गेल्या पाच दिवसात अडीच हजारपैकी दीड हजारावर हरकतींवर सुनावणी झाली. मात्र, सुमारे साडेसातशे हरकतदार प्रत्यक्ष सुनावणीला दांडी (Bunked) मारल्याचे चित्र पाहायला मिळाले. मंगळवारी (ता. ५) सुनावणीची शेवटचा दिवस असून, यात पुन्हा वाढ होण्याची शक्यता आहे. संबंधित पूर्वाश्रमीच्या दहा गावांपैकी बाळापूर येथून सर्वाधिक ७२४ हरकती आल्या, आत्तापर्यंत सुनावणीला दांडी मारणाऱ्यांची संख्याही बाळापूरमधूनच आहे हे विशेष. (Revised taxation of property in boundary area Hearing bunked by 750 objectors Dhule News)

महापालिकेने हद्दवाढीसह संपूर्ण महापालिका क्षेत्रातील मालमत्तांचे जीआयएस मॅपिंग सर्वेक्षण केल्यानंतर मालमत्तांना करयोग्य मूल्य निश्‍चित करण्याची प्रक्रिया सुरू केली आहे. यात मोराणे, महिंदळे, अवधान, पिंप्री, बाळापूर, भोकर, नगाव, चितोड, वरखेडी, नकाणे या पूर्वाश्रमीच्या ग्रामपंचायत क्षेत्रातील मालमत्तांची सुधारित करमुल्यांकनाच्या याद्या प्रसिद्ध करून हरकती मागविण्यात आल्या होत्या. मुदतीअंती एकूण ३४५८ हरकती दाखल झाल्या. या हरकतींवर २७ जूनपासून महापालिकेत सुनावणी सुरू आहे. शनिवार (ता.२) व रविवार (ता.३) वगळता गेल्या सहा दिवसात एकूण २५०४ हरकतींवर सुनावणीची प्रक्रिया पूर्ण झाली. यात मात्र १७६० हरकतदार प्रत्यक्ष सुनावणीला हजर राहिले. तब्बल ७४४ हरकतदार मात्र सुनावणीला गैरहजर राहिले आहेत. जे हरकतदार सुनावणीला गैरहजर राहिले त्यांच्या सुनावणीवर पुढे कोणतीही प्रक्रिया होणार नसल्याचे महापालिकेच्या अधिकाऱ्यांनी यापूर्वीच स्पष्ट केले आहे, त्यामुळे या हरकती केवळ संख्या वाढविणाऱ्या ठरल्या आहेत.

सर्वाधिक बाळापूरमधून
संबंधित दहा गावांपैकी सर्वाधिक ७२४ हरकती बाळापूर येथून दाखल झाल्या आहेत. यातील आत्तापर्यंत ४८० हरकतींवर सुनावणी झाली. यात ३३९ हरकतदार सुनावणीला हजर होते तर तब्बल १४१ हरकतदारांनी सुनावणीला दांडी मारली आहे. अर्थात संबंधित पूर्वाश्रमीच्या सर्व दहा गावांतून हरकतदार सुनावणीला गैरहजर राहात असल्याचे चित्र आहे. मंगळवारी (ता. ५) सुनावणीचा शेवटचा दिवस आहे.

एक जुलैपर्यंतची स्थिती अशी
-एकूण हरकती.....३४५८
-सुनावणी पूर्ण......२५०४
-हजर...............१७६०
-गैरहजर..............७४४
-स्थळ पाहणी........२३६