मेहुणबारे परिसरातील रस्त्यांची लागली वाट 

दीपक कच्छवा
शनिवार, 30 मार्च 2019

शारीरिक व्याधींचे मूळ 
खड्ड्येमय रस्त्यांमुळे दैनंदिन प्रवास करणाऱ्या वाहनचालक व प्रवाशांना शारीरिक व्याधींचा त्रास वाढला आहे. अनेकांमध्ये पाठीचे व मानेचे दुखणे बळावले आहे. बऱ्याचदा गरोदर माता व वृद्धांसाठी हे रस्ते पार करणे म्हणजे मैलाचा दगड ठरतो. रात्री- अपरात्री हे रस्ते वाहनांसाठी घातक ठरत आहे. शारीरिक व्याधींचे मूळ ठरलेल्या या रस्त्यांची चांगल्या दर्जाचे साहित्य वापरून दुरुस्ती करावी, अशी मागणी होत आहे.

मेहुणबारे (ता. चाळीसगाव) ; परिसरातील बहुतांश रस्त्यांची गेल्या अनेक दिवसांपासून अक्षरशः वाट लागली आहे. जागोजागी लहान मोठे खड्डे पडल्याने वाहनधारकांना त्रास सहन करावा लागत आहे. या सर्व रस्त्यांची कामे निकृष्ट दर्जाची झाल्यानेच हे सर्व रस्ते खराब होत असल्याचा आरोप ग्रामस्थांमधून होत आहे. त्यामुळे या सर्व रस्त्यांच्या कामाची चौकशी करून दोषींवर कारवाई करावी व पावसाळ्यापूर्वी रस्त्यांची दुरुस्ती करावी, अशी मागणी होत आहे. 

मेहुणबारे शिदवाडी रस्ता 
चाळीसगाव- धुळे महामार्गावरील मेहुणबारे ते शिदवाडी हा चार किलोमीटर अंतराच्या रस्त्याची दयनीय अवस्था झाली आहे. या रस्त्यालगत पोलिस ठाणे व ग्रामीण रुग्णालय आहे. सध्या या रस्त्यावरून पायी चालणे देखील कठीण झाले आहे. रस्त्यावरील खड्ड्यांमुळे दुचाकी पंक्चर होते. छोटे मोठे अपघात नित्याचे झाले आहेत. या रस्त्यालगतच्या भराडी नाल्यापर्यंत खड्डेच खड्डे पडल्याने वाहनधारकांना त्रास सहन करावा लागतो. या रस्त्याचे काम निकृष्ट दर्जाचे झाल्याने रस्त्याची खडी वर आली आहे. या रस्त्याची तातडीने दुरुस्ती करावी, अशी मागणी शिदवाडीकरांनी केली आहे. 

वरखेडे- लोंढे रस्ता 
वरखेडेपासून चार किलोमीटरचा रस्ताही अत्यंत खराब झाला आहे. रस्त्यावरील डांबर निघून वर आले आहे. साईडपट्ट्या खोल गेल्याने अपघाताची भीती वाढली आहे. या रस्त्यावर शासनाचा मोठा खर्च झालेला असला तरी रस्त्याची पाहिजे तशी दुरुस्ती न झाल्याने रस्ता खराब झाला आहे. रस्त्याच्या दोन्ही बाजूला झाडेझुडपे वाढल्याने लहान मोठे अपघात वाढले आहेत. 

पळासरे रस्ता खड्ड्यात 
पळासरे ते वरखेडे या रस्त्यावर मोठमोठे खड्डे पडले आहेत. हा रस्ता खराब असल्याने पळासरेच्या ग्रामस्थांना वरखेडे येथे दहा किलोमीटर अंतराच्या फेऱ्याने यावे लागते. वरखेडेकडून पळासरे बारीपर्यंत रस्ता झाला असला तरी पुढे अत्यंत खराब असल्याने पायी देखील चालता येत नाही. या रस्त्याच्या दुरुस्तीसाठी शेतकऱ्यांनी वेळोवेळी समस्या मांडल्या. मात्र, त्यांची दखलच कोणी घेत नसल्याचा अनुभव शेतकऱ्यांना आला आहे. पावसाळ्यात या या रस्त्यावरून चालणे अवघड होते. 

लोंढे- पिंजारपाडे रस्ता 
लोंढे ते पिंजारपाडे या सहा किलोमीटर अंतराच्या रस्त्याची अवस्थाही अत्यंत बिकट झाली आहे. मालेगाव तालुक्याला हा रस्ता जोडला गेला आहे. या रस्त्याचे पिंजारपाडा गावापर्यंत तीनतेरा झाले आहे. विसापूर तांडा त्यानंतर पिंजारपाडे असा हा रस्ता असून तो थेट मालेगावला जातो. पिंजारपाडेपासून तीन किलोमीटरवर असलेल्या मालेगाव तालुक्यातील हिसवाळपर्यंत हा रस्ता खराब आहे. हिसवाळच्या पुढे हा रस्ता चांगला झाला आहे. या रस्त्याची दुरुस्ती गेल्या अनेक वर्षांपासून झालेली नाही. त्यामुळे रस्त्याची तातडीने दुरुस्ती करावी, अशी मागणी वाहनधारकांमधून होत आहे. 

शारीरिक व्याधींचे मूळ 
खड्ड्येमय रस्त्यांमुळे दैनंदिन प्रवास करणाऱ्या वाहनचालक व प्रवाशांना शारीरिक व्याधींचा त्रास वाढला आहे. अनेकांमध्ये पाठीचे व मानेचे दुखणे बळावले आहे. बऱ्याचदा गरोदर माता व वृद्धांसाठी हे रस्ते पार करणे म्हणजे मैलाचा दगड ठरतो. रात्री- अपरात्री हे रस्ते वाहनांसाठी घातक ठरत आहे. शारीरिक व्याधींचे मूळ ठरलेल्या या रस्त्यांची चांगल्या दर्जाचे साहित्य वापरून दुरुस्ती करावी, अशी मागणी होत आहे.

Web Title: road condition in Mehunbare chalisgaon